Depýtattar sýdıa kadrlaryn retteýge baǵyttalǵan zań jobasyn maquldady

NUR-SULTAN. QazAqparat – QR Pralamenti Májilisiniń jalpy otyrysynda QR zańnamasyna sot júıesi máseleleri boıynsha engiziletin túzetýler jobasy birinshi oqylymda maquldandy, dep habarlaıdy QazAqparat tilshisi.

«Qazaqstan Respýblıkasynyń keıbir zańnamalyq aktilerine sot júıesi máseleleri boıynsha ózgerister men tolyqtyrýlar engizý týraly» QR Zańynyń jobasy dep atalatyn qujatty Májilis depýtaty Názılá Razzaq tanystyrdy.

«Zań jobasy elimizdiń qoldanystaǵy zańnamasyn QR sot júıesi men sýdıalarynyń mártebesi týraly Konstıtýtsııalyq zańǵa ózgerister men tolyqtyrýlar engizý týraly konstıtıýtsııalyq zań jobasymen sáıkestendirýdi kózdeıdi. Zańnamalyq ózgerister ákimshilik zańnamany jetildirýge, sot júıesin qarjylandyrýdyń jańa modelin qalyptastyrýǵa, sýdıa kadrlaryn retteýge baǵyttalǵan. Osyǵan baılanysty bıýdjet, qylmystyq-protsestik, ákimshilik-rásimdiń protsestik kodeksterge jáne QR Joǵarǵy sot keńesi týraly zańǵa ózgerister engizýdi qajet etedi», - degen Májilis depýtaty Joǵarǵy sot keńesi qyzmetkerleriniń jalaqysyn Joǵarǵy sot sýdıalarynyń eńbekaqysymen sáıkestendirý bóliginde memlekettik bıýdjetten qosymsha qarjy bólýdi talap etetinin eskertti.

«Bul másele boıynsha Úkimetpen respýblıkalyq bıýdjet komıssııasy oń qorytyndy berdi», - dedi ol.

Májilis depýtattary zań jobasyn biraýyzdan maquldap daýys berdi.