Depýtattar sý tasqynyna qarsy is-sharalardyń kemshilikterin atady
NUR-SULTAN. QazAqparat – Májilis depýtaty Jambyl Ahmetbekov el aýmaǵynda sý tasqynyna qarsy is-sharalardy ótkizýdegi kemshilikterdi atady, dep habarlaıdy QazAqparat tilshisi.
«Qazaqstan Halyq partııasy» elimizdegi sý tasqynyna qarsy is-sharalardy ótkizý jónindegi máselelerdi buryn da birneshe ret kótergen bolatyn. Jyl saıyn bolatyn sý tasqyny qanshama azamattarymyzdyń ómiri men múlkine qaýip tóndirýde. Tasqynmen kúreske bólinetin qarjy kólemi de jyldan jylǵa ósý ústinde. Eger «2017-2020 jyldarǵa arnalǵan sý tasqyny qateriniń aldyn alý jáne joıý jónindegi sharalar kesheni» Jol kartasyna 42 mlrd teńge bólinse, 2020-2023 jyldarǵa arnalǵan osyǵan uqsas Jol kartasyna bólingen qarjy 160 mlrd teńgege jetti. Osydan kelip suraq týyndaıdy – nátıje qaıda?», - dedi J. Ahmetbekov Májilistiń jalpy otyrysynda Úkimet basshynyń orynbasary Roman Sklıarǵa joldaǵan saýalynda.
Onyń aıtýynsha, ádette, Tótenshe jaǵdaılar mınıstrligi aldymen jaǵdaıdyń turaqty ekenin jáne sý tasqynyna daıyn ekenimizdi málimdeıdi, al kóktemde elimizdiń júzdegen eldi mekenderi sý astynda qalady. Tasqyn sý turǵyn úılerge, aýlalar men kóshelerge quıylady, avtomobıl joldaryn sý basyp, ınfraqurylymdar buzylady, turǵyndar qaýipti aýdannan shuǵyl kóshiriledi.
«Mine, jaǵdaı jyl saıyn osylaı qaıtalana beredi. Sońǵy bes jyldyń ózinde Qazaqstanda 272 eldi mekendi sý basty, bul 6,5 myńnan astam úı sýǵa ketti degen sóz. Aqmola, Shyǵys Qazaqstan, Qaraǵandy, Qostanaı jáne Soltústik Qazaqstan oblystary jyl saıyn sý tasqynynan zardap shegip otyr. Al keshe elimizdiń astanasy – elorda men onyń mańy tasqyn sýdan zardap shekti, Nur-sultan qalasyndaǵy «Esil» Turǵyn úı kesheniniń jertóle – kólikjaıy sýǵa toldy. Tótenshe jaǵdaılar mınıstrligi elorda irgesindegi Qoıandy kentin sý tasqynynan qutqarý úshin shuǵyl attanýǵa májbúr boldy. Bizdiń partııanyń ókilderi tasqyn sýdyń astynda qalǵan Qaraótkel (Ilınka) aýylyna baryp, ondaǵy sý tasqynynyń zardaptaryn óz kózimizben kórdik. Jergilikti turǵyndar dármensiz kúıde, eńbekpen tapqan dúnıe-múlkinen aırylamyz ba dep qatty alańdaýda. Eldi mekenderdi, mal-múlikti sý basyp, búkil eldi sý tasqyny jaılaǵan kezde sýsorǵymen arpalysqansha, osy apattyń aldyn alyp, sý tasqynyn boldyrmaýdyń amalyn qarastyrǵan jón emes pe!», - dedi depýtat.
Osy oraıda «Qazaqstan Halyq partııasynyń» fraktsııasy tıisti suraqtarǵa jaýap berýdi surady.
«Osyndaı jaǵdaıda baǵdarlama ákimshileriniń baǵdarlamalyq qujattardy naqty oryndaýy jáne olardyń bólingen bıýdjet qarajatyn ıgerýi úshin Úkimet qandaı sharalar qabyldamaq?. 2017-2020 jyldarǵa arnalǵan Jol kartasyn oryndaýǵa jaýapty, biraq ony oryndamaǵan tulǵalar qandaı naqty jaýapqa tartyldy? Osyǵan deıingi atqarylǵan is-sharalar jetkiliksiz bolsa, budan bylaı turǵyn úılerdi, kóshelerdi sý basýǵa jol bermeý jáne basqa da tótenshe jaǵdaılardy boldyrmaý úshin, sý tasqynyna qarsy qaýipsizdikti kúsheıtýge qandaı qosymsha sharalar qabyldanatyn bolady?», - dedi J. Ahmetbekov.
