Depýtattar sý tasqynynan zardap shekkenderge memlekettik qoldaý sharalary týraly aıtty

AQTÓBE. KAZINFORM – Májilis tóraǵasynyń orynbasary Danııa Espaeva jáne depýtattar Juldyz Súleımenova, Maqsat Tolyqbaı, Qazybek Álishev sý tasqynynan baspanasyz qalǵan 40 adam ýaqytsha turyp jatqan Aqtóbe qalasyndaǵy evakýatsııalyq pýnktterdiń birin aralady.

Aqtóbe mańyndaǵy saıajaı turǵyndary tabıǵı apattyń saldarynan birneshe saǵattyń ishinde úı-kúısiz qaldy. Olar tek qujattaryn alyp úlgergen. Qazir zardap shekken turǵyndar Q. Jubanov atyndaǵy Aqtóbe óńirlik ýnıversıtetiniń jataqhanasyndaǵy evakýatsııalyq pýnktte turyp jatyr.

– Sáýir aıynda úıimiz sýǵa ketkennen beri biz evakýatsııa ortalyǵynda turyp jatyrmyz. Munda barlyq jaǵdaı jasalǵan. Úsh mezgil tamaq beriledi, kınoǵa, kontsertterge bıletter taratylady. Partııa ókilderi tórt jasar qyzymdy túzetý balabaqshasyna ornalastyrýǵa kómektesti. Biz jóndeý jumystaryna kirisip kettik, jaqyn arada úıimizge oralatyn kún de alys emes, – deıdi Aqtóbe turǵyny Marjangúl Ernazarova.

Qazirgi ýaqytta bul evakýatsııa pýnktinde 36 adamdy quraıtyn 9 otbasy turady. Aqtóbe qalasy boıynsha barlyǵy 7 ýaqytsha ornalastyrý pýnkti jumys isteıdi, onda qazir 695 adam bolsa, onyń 325-i balalar. 

– Baspanasynan aıyrylý ár otbasy úshin úlken synaq ekenin túsinemiz. Bizdiń mindetimiz – zardap shekkenderdi ýaqytsha ornalastyrýmen qatar, olardy múmkindiginshe tezirek qalypty ómirge oralýyna kómektesý. Biz sý tasqynynan zardap shekkenderdiń árqaısysyna qoldaý men qajetti kómekti alýy úshin bar kúshimizdi salamyz. Birlesken kúsh-jigerimizben biz barlyq qıyndyqty eńserip, joǵalǵannyń bárin qalpyna keltiremiz, – dedi Májilis depýtaty Qazybek Álishev.

Aıta ketý kerek, sý tasqynynan zardap shekken Aqtóbe oblysynyń turǵyndaryna arnap 517 úı salynyp jatyr. Sonymen qatar memleket esebinen 383 páter satyp alyndy.