Depýtattar sporttyq jetistikterge ne kedergi bolyp turǵanyn aıtty
NUR-SULTAN. QazAqparat – Májilistiń jalpy otyrysynda depýtat Aleksandr Mılıýtın sport nysandarynyń turǵyndarǵa qoljetimsizdigi máselesin kóterdi, dep habarlaıdy QazAqparat tilshisi.
«Otandyq sportty damytýǵa baǵyttalǵan jastar bastamalaryn qoldaýdyń tıimdi júıesin qurý Qazaqstan Halyq partııasy baǵdarlamasynyń negizgi basymdyqtarynyń biri bolyp sanalady.
Bul Memleket basshysynyń 2020 jylǵy 1 qyrkúıektegi Qazaqstan halqyna Joldaýynda, sondaı-aq jetinshi shaqyrylǵan Parlamenttiń birinshi sessııasynyń ashylýynda sóılegen sózinde buqaralyq jáne balalar sportyna memlekettik qoldaý kórsetý mindetin qoıǵan tapsyrmasyna tolyq sáıkes keledi. Halyq densaýlyǵynyń el úshin strategııalyq mańyzy bar. Sondyqtan Prezıdent balalar men jasóspirimder sportyn qarjylandyrý kólemin ulǵaıtýdy tapsyrdy jáne Parlament depýtattaryn osy shyǵyndardy baqylaýǵa alýǵa shaqyrdy», - dedi A. Mılıýtın Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń paıymynsha, sportty damytýǵa bólingen bıýdjet qarajatynyń tıimdi jáne maqsatty jumsalatyny úlken kúmán týdyrady.
«Áleýmettik jelilerde jarııalanǵan sport salasyndaǵy zııandy áreketterdiń taǵy bir dáleli – Qazaqstan quramasynyń shańǵyshylary A.Dúısenovtyń, E.Velıchkonyń ashyq haty. Al óz esebinen mektep jasyna deıingi jáne bastaýysh mektep jasyndaǵy balalarǵa arnalǵan shańǵy klýbyn ashqan A.Golovkonyń jaǵdaıy memleketten qoldaý tappady. Qarajat taýsyldy, klýb ta jabyldy. Ol bizdiń elge qajetsiz bolyp shyqty. Sondyqtan qazir Marokko shańǵyshylaryn jattyqtyrýǵa májbúr», - dedi depýtat.
Onyń aıtýynsha, ókinishke qaraı, bizdiń balalar ýaqytyn únemi kompıýter men telefonda ótkizedi. Al sportqa degen qyzyǵýshylyq kóbinese elikteýdiń arqasynda paıda bolady. Mysaly, boks sektsııasyna baratyndar S.Qonaqbaev, G.Golovkın, S.Sápıev sekildi dańqty sportshylarǵa elikteıdi, al júzgishter D.Balandın, A.Mýsınge qarap boı túzeıdi.
«Eger sportshylardy daıarlaýǵa bólingen qarajat maqsatty túrde jumsalmaıtyn bolsa, onda qandaı sporttyq jetistikter týraly aıtýǵa bolady?! Ásirese daryndy balalarǵa arnalǵan mektepter jabylýda. Azamattar Aqmola oblysyndaǵy «Qysqy sport túrleri boıynsha olımpıadalyq daıarlaý ortalyǵy» shańǵy-bıatlon stadıonynyń, Shyǵys Qazaqstan oblysyndaǵy «Abaı Arena» stadıonynyń, Nur-Sultan jáne Almaty qalalaryndaǵy stadıondardyń qoljetimsizdigine shaǵymdanady. Memleket óz azamattary úshin sport keshenderin salýǵa qarajat bóledi. Biraq munyń bári qoljetimdi emes, sebebi qymbat.
Mundaı jaǵdaı búkil respýblıkada bar», - dedi Mılıýtın.
Aıtylǵandarǵa baılanysty depýtat sportshylardyń ótinishterine qatysty faktiler boıynsha tıisti suraqtarǵa jaýap berýdy surady.
«2021 jylǵa, sonymen qatar Qazaqstan Respýblıkasynda dene shynyqtyrý men sportty damytýdyń 2025 jylǵa deıingi tujyrymdamasyn iske asyrý aıasynda balalar men jasóspirimder sport mektepterin odan ári damytý men qoldaýdyń qandaı sharalary josparlanǵan? Ulttyq sport túrlerin damytý aıasynda mektep baǵdarlamasyna engizý úshin «qazaq kúresi», «toǵyzqumalaq» jáne «asyq atý» boıynsha mindetti sabaqtardy ótkizý ádistemesin ázirleý qashan aıaqtalady? Mektep jasyna deıingi jáne mektep jasyndaǵy balalardyń sport úıirmesine tegin barý máselesi qalaı sheshilgen?», - dep surady A. Mılıýtın.
