Depýtattar sottalǵandarmen kezdesý jáne sálemdeme berý normalarynyń saqtalýyn quptaıdy
ASTANA. QazAqparat - Májilis depýtattary sottalǵandarǵa qatysty olarmen kezdesý jáne sálemdeme berý normalarynyń saqtalýyn quptaıdy. Bul týraly búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysy barysynda málim boldy. Eske sala keteıik, onda Qylmystyq is júrgizý kodeksiniń jobasy talqylanǵan bolatyn.
Toqtala ketetin jaıt, Qylmystyq is júrgizý kodeksi jobasyna sáıkes, Іshki ister mınıstrligi sottalǵandarmen kezdesýlerdi jáne sálemdemeler sanyn qysqartý týraly usynys engizgen. Mundaı pozıtsııany Májilis depýtattary «tym qataldaý normaǵa» balap otyr.
Al zań jobasy boıynsha baıandaǵan depýtat Svetlana Bychkovanyń aıtýynsha, depýtattar sottalǵandar úshin sálemdeme alý men olardyń kezdesýge qatysty múmkindigin qoldanystaǵy kodeks normalaryna sáıkes qaldyrýdy jaqtaıdy. «Jalpy, Іshki ister mınıstrligi usynǵan norma belgili bir deńgeıde shyǵynǵa ushyratady, óıtkeni, ondaı pozıtsııa bıýdjettik qarjyny qaıta qaraýmen baılanysty. Sondyqtan da ondaı normany qalyptastyrý úshin bizge Úkimet qorytyndysyn alý kerek», - dedi ol.
Toqtala ketetin jaıt, kodeks jobasy sottalǵandardyń tamaq ónimderi túrindegi sálemdemeler alýyna tyıym salýdy, al kezdesýge naqty ýaqyt belgileýdi qarastyrady.
Tutastaı alǵanda, zań jobasy sottalǵandardyń quqyqtary men zańdy múddeleriniń qorǵalý deńgeıin, qylmystyq jazalardy oryndaýdyń tıimdiligin edáýir arttyrýǵa baǵyttalǵan.
