Depýtattar sot-medıtsınalyq saraptama salasyna qatysty usynys aıtty
«Sot-medıtsınalyq saraptama salasynda ilgerileýshilik baıqalmaıdy. Bul salada qazir de maman jetispeýshiligi qatty seziledi. Al sot-medıtsına sarapshylary bar aýdandarda mynandaı qıyndyq aldan shyǵýda. Sot-medıtsınalyq saraptama qazir Densaýlyq saqtaý mınıstrligine emes, Ádilet mınıstrligine qaraıtynyna baılanysty sot-medıtsınalyq sarapshylar ózderi jumys isteıtin aýrýhanalardyń bas dárigerlerine tikeleı baǵynbaıdy. Qyzmet babynda jumys kúnderi óz mindetterin atqarǵanymen, senbi-jeksenbi kúnderi taptyrmaıdy. Ol kúnderi kezekshilik atqarylmaıdy. Sonyń saldarynan tosynnan kelgen ajal jaǵdaıynda (operatsııa ústinde, jol-kólik oqıǵasynan, qurylysta nemese óndiriste jaraqat alýdan, kisi qolynan bolatyn ólim tusynda) saraptama jasalýǵa tıisti máıit dúısenbige deıin aýrýhanada nemese máıithanada sol kúıinde jatyp qalatyn jaǵdaı jıi kezdesedi. Munyń aıaǵy marqumnyń denesin tórtinshi, tipti keıde besinshi kúni ǵana jer qoınyna berýge uryndyrady», - dep toqtaldy depýtat Saýytbek Abdrahmanov Májilistiń jalpy otyrysynda.
Osy oraıda S. Abdrahmanov bul qaı jaǵynan da óte aýyr ekenin atap ótti. Halyqpen kezdesý barysynda osy jaıdy jetkizýshiler sot-medıtsına saraptamasy qyzmetin Ádilet mınıstrliginen qaıtaryp, Densaýlyq saqtaý mınıstrligine berýdi usynǵan kórinedi.
«Biz olaı etý durys dep sanamaıtynymyzdy, kez kelgen salanyń qyzmetine baǵa beretin saraptama syrttan jasalýy jón ekenin aıttyq. Biraq, máseleni mynandaı jolmen sheshýge bolatyn sııaqty kórinedi. Sot-medıtsına sarapshylarynyń demalys nemese mereke kúnderindegi kezekshiligin belgileý oılastyrylsa deımiz. Árıne, ol kezekshilerdiń sol kúnderi jamanat bolyp qala ma dep aýrýhanada táýliktep otyrýy mindet emes, áıtse de sol kúnderi uıaly telefony qosýly, onyń ústine jumys babynda, ıaǵnı tosynnan shaqyrýǵa daıyn turýy mindetti dep sanalsa deımiz», - dedi depýtat.
