Depýtattar Shymkenttegi temir ótkeliniń, Mańǵystaýdaǵy GES qurylystarymen tanysty
ASTANA. KAZINFORM - Májilis depýtattary, «AMANAT» partııasy fraktsııasynyń músheleri Bolatbek Nájmetdınuly men Danabek Isabekov Shymkent qalasyndaǵy Momynov kóshesiniń boıynda salynyp jatqan temirjol ótkeliniń qurylysymen tanysyp, jergilikti turǵyndarmen kezdesti.
Joba aıasynda temirjoldyń ústinen tórt jolaqty aspaly kópir salynyp, ol jaıaý júrginshilerge arnalǵan jolmen jabdyqtalady. Sonymen qatar jol qaýipsizdigin qamtamasyz etý úshin jaryqshamdar ornatylady. Qurylys 2024 jyldyń qarashasynda bastalǵan. Qazirgi tańda nysannyń qurylys beldeýine túsetin birneshe jeke menshik jer telimin memleket qajettigine alý máseleleri qarastyrylyp jatyr, al qalǵan jumystar josparǵa sáıkes júrgiziledi.
Nysandy aralap kórgen depýtattar qurylys jumystarynyń sapaly ári ýaqytynda oryndalýyn qadaǵalaý qajettigin erekshe atap ótti.
– Megapolıstegi halyq sanynyń artýynan kólik keptelisiniń jıileı túsetini belgili. Al osyndaı aspaly kópirler men jolaıryqtar halyqtyń júrip-turýyn jeńildetip, qaýipsizdik deńgeıin arttyrady. Mundaı aýqymdy nysandy jobalaǵanda jergilikti halyqtyń usynystary men pikirlerin eskerý kerek. Eń bastysy salaǵa jaýapty azamattardy qurylys jumystaryn sapaly júrgizilýin qadaǵalaýdy myqtap qolǵa alýǵa shaqyramyn, – dedi Bolatbek Najmetdınuly.
Shymkentte Tilenshın kóshesiniń boıynda taǵy bir aspaly kópir salynyp jatyr. Eki nysandy da 2025 jyldyń sońyna deıin paıdalanýǵa berý josparlanyp otyr. Jobalardy júzege asyrý qala turǵyndarynyń ómir súrý jaǵdaıyn jaqsartýǵa, kólik qyzmetiniń tıimdiligin arttyrýǵa, kólik qaýipsizdigin qamtamasyz etýge yqpal etedi.
Sonymen qatar búgin Mańǵystaý oblysynda kún, jel jáne gaz energııasymen jumys isteıtin 247 MVt gıbrıdti elektr stantsııasy salynyp jatyr. Búgin Májilis depýtattary Edil Jańbyrshın jáne Samat Musabaev osy stantsııanyń qurylysymen tanysty.
Nysan qurylysy 2024 jyly bastalǵan. Ol – «Qazmunaıgaz» UQ jáne ıtalııalyq «ENI» kompanııasynyń birlesken jobasy. Bas merdiger – «Hi-Teck «Qazaqstan» seriktestigi.
Májilis depýtaty Edil Jańbyrshın Memleket basshysynyń tapsyrmasy boıynsha elimizde kómirtektik beıtaraptyq strategııasyn júzege asyrý bastalǵandyǵyn atap ótti.
– Kún elektr stantsııasy 50 MVt, jel stantsııasy 77 MVt jáne gaz stantsııasy – 120 MVt qýatpen jumys isteıdi. Gıbrıdti stantsııa Jańaózen qalasyndaǵy kásiporyndardy, munaı óndirýshi kompanııalar men «Qazmunaıgaz» gaz óńdeý zaýytyn elektr energııasymen turaqty túrde qamtamasyz etedi, – dedi E.Jańbyrshın.
Qurylysshylarmen áńgimelesý barysynda depýtattar Parlamentte qabyldanǵan zańdardyń júzege asyrylýy jóninde pikir almasty. Ásirese, «Jer qoınaýy jáne jer qoınaýyn paıdalaný» týraly zańnyń artyqshylyqtaryn ortaǵa salyp, bul qujat Prezıdenttiń qoǵamda ádildik ornatýǵa baǵyttaǵanyna nazar aýdardy.
Aıta ketý kerek, Mańǵystaýda salynyp jatqan gıbrıdti elektr stantsııasy ınnovatsııalyq joba. Elimizde alǵash ret júzege asyrylyp otyr. Stantsııa iske qosylǵan soń 70 adam jumyspen qamtylady. Aımaqty energııamen qamtamasyz etýdiń jańa kózderi kómirqyshqyl gazynyń qaldyqtaryn azaıtady. Stantsııa qurylysyn 2025 jyldyń naýryz aıynda aıaqtaý josparlanǵan.
Eske sala keteıik, 5 qańtarda Májilis depýtattarynyń óńirlerge jumys sapary bastaldy. Depýtattar óndiristik jáne áleýmettik nysandardy aralap, eńbek ujymdarynda kezdesýler ótkizip, azamattardy jeke máseleleri boıynsha qabyldaıdy. Sonymen qatar olar saılaýshylarǵa qabyldanǵan zańnamalyq ózgerister týraly aqparat berip, máselelerin tyńdaıdy. Óńirlerde saılaýshylar kótergen eń ózekti máselelerdi sheshý Májilistiń jalpy otyrystarynyń birinde Úkimetpen birlesip qaralatyn bolady.
Aıta keteıik, Almaty oblysynda mıllıardtar bólingen Mádenıet úıiniń qurylysy toqtap tur.