Depýtattar sheneýnikterdiń ımporttyq qyzmettik kólikterine narazylyq bildirdi
«Prezıdent Joldaýynda otandyq óndirýshilerdi qoldaýdyń tetikterin jetildirýdi jáne olardyń múddesin qorǵaý úshin barlyq qajetti sharalardy qabyldaýdy tapsyrǵan bolatyn. Sonymen qatar 2015 jyldyń aqpanynda Úkimettiń keńeıtilgen otyrysy barasynda Memleket basshysy «Qazaqstandyq ónimdi satyp al» aktsııasyn iske qosýdy usyndy. Degenmen de memlekettik organdardyń ókilderi osy úndeýdiń basymdyqtaryn eskermesten, burynǵysynsha sheteldik kólikterdi satyp alýdy qalap otyr. Ústimizdegi jyldyń basynan beri memlekettik organdardyń sheneýnikteri 400-den astam ımporttyq qymbat avtokólikterdi satyp aldy, onyń ishinde qyryq avtomobıl sońǵy kezde shyǵarylǵan «Land Cruiser 200» men «Land Cruiser Prado», sondaı-aq 100-den astamy «Toyota Camry» sekildi modelder. Qazaqstanda qurastyrylǵan mashınalar paıdalaný kezinde aıtarlyqtaı tıimdi emes degen syltaýlary senýge kelmeıdi. Birinshiden, óndirýshilerge qatysty memlekettik organdardan resmı narazylyq týraly aqparat joq. Ekinshiden, memleket otandyq avtoónerkásipti qoldaýǵa qomaqty qarjy bólýde, sondyqtan da óndirýshilerden ónimniń sapasyn talap etýge quqyly»,-dep atap ótti depýtat Keńes Ǵarapuly Úkimet basshysyna joldanǵan saýalynda.
Osy oraıda ol memlekettik organdar otandyq taýarlardy qoldaýda qoǵamǵa úlgi bolýy tıis ekenin aıta kele, bul turǵyda búginde sheneýnikter barlyǵyn kerisinshe jasap otyrǵanyn, ıaǵnı halyqtyń aqshasyna birinen-biri asyp túsýge umtylatynyn atap ótti.
Sóz sońynda ol Premer-Mınıstr Baqytjan Saǵyntaevtan «Aq jol» depýtattyq fraktsııasy atynan qyzmettik avtokólikti alý boıynsha memlekettik jáne kvazımemlekettik sektardyń satyp alýlaryn júrgizýdiń negizdiligin qaıta qarastyrý máselesin surady. Sonymen qatar otandyq taýar óndirýshilerdi qoldaý turǵysynda Memleket basshysynyń tapsyrmasyn elemeı júrgen memorgandardyń basshylaryn jaýapkershilikke tartý usynysy jasaldy.
