Depýtattar shektelýge jatpaıtyn aqparattardyń tizimin jasady
ASTANA. QazAqparat - "Aqparattyń qoljetimdiligi týraly" zań jobasyn ázirleýshiler kez kelgen jaǵdaıda da shekteýge jatpaıtyn aqparattyń tizimin jasady. Bul týraly búgin xalyqaralyq konferentsııada QR Parlamenti májilisiniń depýtaty Máýlen Áshimbaev málim etti.
"Bizdiń qoldanystaǵy "Memlekettik qupııalar týraly" zańymyzda qupııalaýǵa jatpaıtyn aqparat tizimi bar. Biz bunymen toqtaǵan joqpyz. Biz qupııalaýǵa ǵana emes, shekteýge de jatpaıtyn aqparattardyń tizimin jasap shyqtyq. Biz bul tizimdi meılinshe keńeıtýge tyrystyq. Onda lańkestik aktileri týraly faktiler, órt qaýipsizdigi jaǵdaıy, sanıtarlyq, epıdemıologııalyq jáne radıatsııalyq qaýipsizdik, azyq-túlik qaýipsizdigi, respýblıkalyq jáne jergilikti bıýdjettiń jumsalýy, jasaqtalýy týraly aqparattar jáne xalyqtan eshqashan jasyrylmaýy tıis málimetter engen", - dedi depýtat.
Onyń sózi boıynsha, zań jobasynda osy aqparattardyń kózderi bolyp tabylatyn sýbektiler de kórsetilgen.
"Sizder bilesizder, ulttyq kompanııalar men 100 paıyz memleket menshigindegi kompanııalar bar. Soǵan baılanysty, zań ázirleýshiler ulttyq kompanııalar men kvazımemlekettik sektorlarǵa da qoǵam úshin aqparattyń qoljetimdiligin qamtamasyz etýleri mindetti dep kórsetip otyr", - dedi ol.
Aqparat ıelenýshilerdiń taǵy bir toby - bıýdjettik qarajatqa ıe bolǵan zańdyq tulǵalar.
"Olar memlekettik emes qurylymdar da bolýy yqtımal. Atap aıtqanda, bıýdjettik qarajat alǵan ÚEU, JShS nemese AQ. Eger zańdy tulǵa memlekettik bıýdjetten kiris tapqan bolsa, bıýdjettik qarajatty jumsaý boıynsha aqparattardy usynýy tıis", - dep atap ótti M. Áshimbaev.
Depýtattyń aıtýynsha, aqparatpen bólisýi tıis sýbektilerdiń qataryna monopolııalyq basymdyqqa ıe nemese tótenshe jaǵdaılar týraly, tabıǵı jáne texnogendik qaipsizdik aqparattaryna ıelik etetin zańdyq tulǵalar da kirgizilip otyr.
