Depýtattar Shardara sý qoımasy men Kóksaraıdyń qaýipsizdigine qatysty usynys aıtty

NUR-SULTAN. QazAqparat – Májilis depýtaty Faızolla Qamenov «Shardara» sý qoımasy men «Kóksaraı» sý rettegishiniń qaýipsizdigine qatysty máseleni kóterip, Úkimet basshysynyń orynbasary Roman Sklıardiń atyna saýal joldady, dep habarlaıdy QazAqparat tilshisi.

«2020 jyldyń mamyrynda Ózbekstannyń Syrdarııa oblysyndaǵy «Sardoba» sý qoımasyndaǵy bóget buzylyp sol eldiń 22 eldi mekenin sý basqanyn bilesizder. Syıymdylyǵy 922 mln tekshe metr bolatyn «Sardoba» sý qoımasy 2017 jyly salynǵan. Sý qoımasynyń bıiktigi - 28,8 metr. Kórshi eldiń 70 myń adamy kóshirilip, bul apattan ońtústiktegi óz aǵaıyndarymyz da asa aýyr zardap shekken bolatyn. Túrkistan oblysynyń Maqtaral aýdanynda 845 úı, 3 mektep, 5 balabaqsha, 4 medıtsına ǵımaraty men mádenıet úıi jáne 54,7 km kópir men joldy sý alǵan. Syrdarııa – transshekaralyq ózen. «Sardoba» sý qoımasy Ózbekstan jaǵynan sapasyz salynǵany óz aldyna, kóńildi alańdatatyn taǵy bir másele ol «Shardara» sý qoımasynyń tehnıkalyq jaǵdaıy. Halyqtyń aıtýy boıynsha, qoımanyń jaǵdaıy máz emes, qaýip tónip tur dep dabyl qaǵyp jatyr. «Sardoba» sý qoımasynyń sý jınaý múmkindigi 900 mıllıon tekshe metr bolatyn bolsa, «Shardara» sý qoımasynyń sý jınaý múmkindigi 5 mıllıard 200 mıllıon tekshe metr», - dedi depýtat Mádilistiń jalpy otyrysynda.

Onyń paıymynsha, «Shardara» sý qoımasy tehnıkalyq-ekonomıkalyq negizdeme negizinde qaıtadan kúrdeli jóndeýden ótpese, ol ózinen 110 km tómende jatqan «Kóksaraı» sý qoımasyn qosyp alyp ketedi. «Shardara» sý qoımasy óte úlken. Ekeýin qosqan kezde shamamen 8 mıllıard 200 mıllıon tekshe metr sý bolady.

«Budan shyǵatyn qorytyndy, «Shardara» sý qoımasy men «Kóksaraı» sý rettegishiniń qaýipsizdigi óte mańyzdy másele. Osy sý qoımalarynyń qaýipsizdigi jóninde kezek kúttirmeıtin máselelerdi Sý resýrstary komıtetiniń basshysyna, Úkimetke taǵy da bir jetkizýdi ózimniń paryzym dep sanaımyn. Qurmetti Roman Vasılevıch, joǵaryda baıandalǵannyń negizinde, Sizden osy depýtattyq saýaldy qarap jáne qabyldanǵan sharalar týraly Qazaqstan Respýblıkasynyń qoldanystaǵy zańnamasyna sáıkes jazbasha túrde joldaýyńyzdy suraımyn», - dedi depýtat Qazaqstan Halyq partııasynyń fraktsııasy atynan joldaǵan saýalynda.

Budan buryn habarlanǵandaı, Ózbekstan Sardoba sý qoımasyn qalpyna keltirý josparyn Qazaqstanmen kelisip bekitedi.