Depýtattar Shahtınsk qalasynyń jylý berý maýsymyna daıyndyǵyn tekserdi

QARAǴANDY. KAZINFORM – Shahtınsk qalasynda jańa jylý maýsymyna daıyndyq júrip jatyr. Májilis depýtattary, «AMANAT» partııasy fraktsııasynyń músheleri Únzıla Shapaq, Tilektes Adambekov pen Nıkıta Shatalov jergilikti jylý elektr ortalyǵyn qaıta jańǵyrtý jumystarymen tanysty.

Qaraǵandy oblysy Shahtınsk qalasynyń turǵyndary ótken qysta úıleriniń sýyq ekenin aıtyp, birneshe ret shaǵymdanǵan. Májilis depýtattaryna jáne «AMANAT» partııasyna birneshe ótinish tústi. Páterlerde jáne áleýmettik nysandarda aýa temperatýrasy +12-15℃ deıin tómendegen.

Depýtattar jóndeý jumystarynyń barysymen tanysyp, aldaǵy jylytý maýsymyna daıyndyq máselelerin stantsııa basshylyǵymen, merdigerlermen jáne qalalyq, oblystyq ákimdik ókilderimen talqylady.

– Eger barlyq jumysty ýaqytynda aıaqtamasaq, qaladaǵy 40 myńǵa jýyq turǵyn jylýsyz qalýy múmkin. Tozyǵy jetken kommýnaldyq jelilerdiń sanyn azaıtý jáne turǵyn úı-kommýnaldyq sharýashylyqtyń turaqty jumysyn qamtamasyz etý – «AMANAT» partııasynyń saılaýaldy baǵdarlamasynyń basym baǵyttarynyń biri. Bıyl qysta adamdar elektr qýatyn artyq jumsap, jylytqyshtardy qosýǵa májbúr boldy, terezelerge muz qatty. Sazǵa uqsaǵan kómirdiń sapasy da syn kótermedi. Depýtattar JEO máselesin erekshe baqylaýda ustaıtyn bolady, – dedi májilismen Nıkıta Shatalov.

«Shahtınskteploenergo» JShS ókilderiniń habarlaýynsha, qazirgi ýaqytta úsh qazandyq qondyrǵysynda montajdaý jumystary júrip jatyr. Al eki týrbınada aǵyndy bólimniń jumystary aıaqtaldy. Negizgi jáne qosalqy jabdyqtardy daıyndaý da jalǵasýda.

Turǵyndardyń úıin jylytý úshin osy jazda Shahtınsk qalasynda 3,7 shaqyrym jylý jelisin aýystyrý josparlanǵan. Sondaı-aq 2 shaqyrymdyq qubyrdyń jylý oqshaýlaýy qalpyna keltirilmek. Jóndeý jumystaryna barlyǵy 150-ge jýyq adam jumyldyrylǵan. 

– Merdiger uıymdar №1, №3 jáne №4 qazandyqtarynda jumys istep jatyr. №1 qazandyqtyń jóndeý jumysy aıaqtaldy, №3 qazandyqta montajdaý jáne demontaj jumysy júrgizilýde, ol jylytý maýsymy bastalǵanǵa deıin aıaqtalady. №4 qazandyqty jóndeý 15 qyrkúıekke deıin aıaqtalady. Buǵan qosa, eki týrbogeneratordyń jóndeý jumystary 100 paıyz oryndalǵan. Qazandyqtar men bý qazandaryn tazalaý jáne montajdaý jumystary júrgizilýde, – dedi «Shahtınskteploenergo» JShS tehnıkalyq dırektory Abylaı Seıdýáli. 

Sonymen qatar qorshaǵan ortanyń lastanýynyń aldyn alý úshin kómirdiń ornyna tabıǵı gazben jylytý máselesi qarastyrylýda. Qala shekarasyna joǵary qysymdy gaz qubyry tartyldy, al bıyl avtomattandyrylǵan gaz taratý stantsııasynyń qurylysyn aıaqtaý josparlandy.

Eske sala keteıik, buǵan deıin «AMANAT» partııasy fraktsııasynyń músheleri Shahtınsk qalasyndaǵy jylý máselesin kóterip, Úkimetke depýtattyq saýal joldaǵan bolatyn. Osyǵan baılanysty Qaraǵandy oblysy boıynsha Atomdyq jáne energetıkalyq qadaǵalaý men baqylaý komıteti Shahtınsk JEO-na jospardan tys tekserý júrgizip, temperatýralyq kesteni saqtamaǵany úshin aıyppul saldy.

Aıta keteıik, «AMANAT» partııasynyń saılaýaldy baǵdarlamasyn júzege asyrý aıasynda Qaraǵandy oblysynda 247,3 shaqyrymdyq jylý jelilerin, 320 shaqyrymdyq elektrmen jabdyqtaý jelilerin, 110,8 shaqyrymdyq sý burý jelilerin kúrdeli jóndeý jáne qaıta jańartý josparlandy. Sondaı-aq 2027 jylǵa deıin 109 aýyldyq eldi mekende blok-modýldi sý tazartý keshenderi ornatylyp, 10 eldi mekenge gaz jetkiziletin bolady.