Depýtattar sertıfıkatsyz taýarlarǵa aıyppul mólsherin eselep kóterýdi usynady
ASTANA. QazAqparat - Elimizge kelip jatqan sertıfıkaty joq taýarlarǵa aıyppul mólsherin arttyrý kerek. Búgin Májiliste Ekonomıkalyq reforma jáne óńirlik damý komıtetiniń keńeıtilgen otyrysynda Májilis depýtaty Azat Perýashev osylaı aıtty. Eske salaıyq, jıyn barysynda tutynýshy ónimderin tehnıkalyq retteý máseleleri talqylanǵan bolatyn.
«Tehnıkalyq retteý salasynda birqatar máseleniń aldyn alý kerek, ári bul asa mańyzdy. Birinshiden, búgingi kúni sáıkestik sertıfıkatynyń bolmaýyna qatysty salynatyn aıyppul óte tómen. Qazir tipti Qazaqstanǵa sertıfıkattalmaǵan nemese jalǵan sertıfıkattary bar taýarlardy tasý sheteldikter úshin tıimdi bolyp otyrǵandaı. Bulardy saýdalaǵany úshin salynatyn aıyppul tipti kúlkini keltiredi. Bul óz kezeginde kóleńkeli ekonomıkany da týdyryp jatyr. Sondyqtan da, sertıfıkattalmaǵan taýardy elimizge ákelý ekonomıkalyq tıimsiz bolatyn tetikterdi qarastyrǵan oryndy», - deıdi Azat Perýashev.
Májilis depýtatynyń aıtýynsha, jalǵan qujattar beretin sertıfıkattaý organynyń basshylary men sarapshylaryna jaýapkershilikti qataıtý qajet. Óıtkeni, bunda azamattardyń ómiri men densaýlyǵyna qatysty qaýipter týyndap otyr.
«Budan soń, ondaı taýarlardy rynoktan jedel túrde alastatý mehanızmin jetildirýge tıispiz. Óıtkeni, kimniń aq, kimniń qara ekenin sot arqyly dáleldeýge birshama ýaqyt ketedi. Al bul ýaqytta taýar rynokqa tutastaı enip, satylyp ketip jatyr. Sondyqtan da, sertıfıkaty bolmaǵan taýar birden satýdan tyıylsyn», - dedi A.Perýashev.
