Depýtattar senbilikti asarmen almastyrýdy «popýlızm» dep sanaıdy
ASTANA. QazAqparat - Halyq qalaýlylarynyń aıtýynsha, senbiliktiń ózindik orny bar. Al ony asarmen almastyrý bastamalary «halyqtyń kózine túsý úshin» aıtylǵan, dep habarlaıdy QazAqparat tilshisi.
«Bul - jaı sóz. Talqylaıtyn nárse emes. Bir kúnde úı salyna ma eken? Popýlızm. Bir kúnde eshqandaı úı salynbaıdy. Áıteýir, tosyn oı úshin aıtylǵan áńgime. Senbilik - adamdardyń birge jumys istep, qalanyń kóriktendiretin, kógaldandyratyn kúni, odan sotsıalızmniń sarqynshaǵyn izdeýdiń ózi, ásheıin, qalaı da, tosyn oı aıtý úshin... Bul jaqsylyq, bul kóktem kúninde jurtshylyqtyń óz qalasyn kórkeıtýge birlesip jumys isteýi ǵana», - deıdi depýtat Saýytbek Ábdirahmanov.
Depýtat Ahmet Muradov ta senbilik pen asardy bólek qarastyrý qajet dep sanaıdy. «Asardy senbilikpen salystyrýǵa bolmaıdy dep oılaımyn. Onyń maǵynasy keń. Qazaqta «asar» deıdi, sheshenderde «belhı» dep ataıdy. Túrikterde de ondaı dástúr bar. Olar bir túnniń ishinde bir úıdi kóteredi de, ertesinde otbasy ol úıde tura beredi. Oǵan jaqyn týǵan-týysqandar, kórshiler atsalysady. Sondyqtan jaqyn adamǵa kómektesý - ol ósıet, paryz. Al senbilik - bul ortaq iske qosqan taǵy bir úlesiń, ujym ishindegi qarym-qatynastyń taǵy bir túri», - deıdi Muradov QazAqparat tilshisine bergen suhbatynda.
Maıra Aısına bolsa, áleýmettik jelilerde «senbiliktiń kommýnızmnen qalǵan bir dástúr» sııaqty pirirtalastardy jıi oqıdy. «Feısbýkta adamdar «Senbilikter ne úshin kerek? Ony kommýnıster oılap tapty» degendi kóp jazady. Kommýnıster oılap tapsa, tapqan da shyǵar. Degenmen, ondaı sharalardyń arqasynda biz ortaq iske degen óz úlesimizdi qosyp otyrǵanymyzdy sezine alamyz», - dep atap kórsetti Aısına.
Aıta keteıik, Astanada ótken jıyndardyń birinde QR Bilim jáne ǵylym mınıstrliginiń Memleket tarıxy ınstıtýty dırektorynyń orynbasary, tarıxshy ǵalym Amangeldi Qashqymbaev senbilikti ótetin kúndi qazaqtyń «asar» atty ulttyq dástúri úlgisinde ótkizýdi usyndy . «Men oılaımyn, búginde «senbilik» degen sharanyń túpki maqsatyn anyqtap alýymyz qajet. Óıtkeni qazirgi kezde bizdiń uıymdastyryp júrgen senbilikterimiz keıde túkke turǵysyz sharaǵa aınalyp ketedi. Máselen, biz 20-30 adamdy alyp baramyz da, kóshe sypyramyz. Ol neǵylǵan senbilik? Sondyqtan senbilikti tek kúl-qoqys jınaýdyń sharasy emes, qazaqtyń «asar» sııaqty ulttyq dástúri retinde keńinen ótkizgen jón. Mysaly, buryn aýylda «asardy» jıi jasaıtyn. Asar deıdi de, bireýdiń úıin salyp beredi. Kelesi joly taǵy bireýdiń úıin turǵyzady. Mine, bizdiń ulttyq bolmysymyz saı senbilik degen osyndaı bolýy kerek», - deıdi Qashqymbaev. 
