Depýtattar Senat otyrysynyń kún tártibin bekitti
ASTANA. KAZINFORM – Senat Tóraǵasy Máýlen Áshimbaev palata bıýrosynyń otyrysyn ótkizdi. Onda depýtattar 16 mamyr kúni ótetin Senat otyrysynyń kún tártibin bekitti.
Palata otyrysynda senatorlar «1993 jylǵy 14 qańtardaǵy Qazaqstan Respýblıkasy men Qytaı Halyq Respýblıkasy arasyndaǵy Azamattyq jáne qylmystyq ister boıynsha quqyqtyq kómek kórsetý týraly shartqa ózgerister engizý týraly hattamany ratıfıkatsııalaý týraly» zańdy qaraıdy.
Qujat normalary eki el azamattarynyń quqyqtaryn qorǵaýdyń tıimdiligin arttyrýǵa, sondaı-aq, azamattyq jáne qylmystyq ister boıynsha quqyqtyq kómek kórsetý baǵytyndaǵy yntymaqtastyqty damytýǵa arnalǵan.
Aıta keteıik, Hattamaǵa Memleket basshysy Qasym-Jomart Toqaevtyń 2023 jylǵy 17 mamyrda QHR-ǵa jasaǵan sapary aıasynda eki memlekettiń Syrtqy ister mınıstrleri qol qoıdy.
Sonymen qatar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Eýrazııalyq ekonomıkalyq odaqqa múshe memleketter ónerkásip salalarynda birlesken kooperatsııalyq jobalardy iske asyrǵan kezde qarjylaı járdem kórsetý bóliginde ózgerister engizý týraly hattamany ratıfıkatsııalaý týraly» zań da palata otyrysynyń kún tártibine shyǵaryldy.
Zań Eýrazııalyq ekonomıkalyq odaqqa múshe memleketterdiń ónerkásip salalaryndaǵy birlesken kooperatsııalyq jobalaryn qarjylandyrýdyń quqyqtyq negizderin qalyptastyratyn hattamany ratıfıkatsııalaýdy kózdeıdi.
Sondaı-aq qujatta ónerkásip salalaryndaǵy birlesken kooperatsııalyq jobalardy iske asyrýdy qoldaýǵa arnalǵan ózgerister men tolyqtyrýlar engizý qarastyrylǵan. Onyń tizbesin EAEO-nyń Úkimetaralyq keńesi aıqyndaıdy.
