Depýtattar saýalyna ýaqytyly jaýap bermegen departament basshysy tártiptik jaýapqa tartyldy
NUR-SULTAN. QazAqparat – Májilis depýtattarynyń resmı saýalyna ýaqytyly jaýap bermegen QR BǴM Bilim berýdi tsıfrlyq transformatsııalaý departamentiniń dırektory tártiptik jaýapqa tartyldy. Bul týraly QR Premer-Mınıstri Asqar Mamınniń depýtattar saýalyna bergen jaýabynda aıtylǵan, dep habarlaıdy QazAqparat tilshisi.
«Qazaqstan Respýblıkasymen Halyqaralyq qaıta qurý jáne damý banki arasyndaǵy zaım týraly (orta bilimdi jańǵyrtý jobasyna) kelisim 2018 jyldyń 13 maýsymynda QR zańymen ratıfıkatsııalandy. Zaım somasy 67 mln dollardy quraıdy. Zaım óteý kúni - 2020 jyldyń 31 jeltoqsany. Joba 2018-2022 jyldary aralyǵynda júzege asyrylady. Jobanyń maqsaty – orta bilim júıesi sapasyn jaqsartý jáne aýyl mektepteri oqýshylarynyń úlgerimin kóterý.
Jobanyń negizgi komponentteri – orta bilim berý júıesin jetildirýge qoldaý kórsetý, bilim nátıjeleriniń aıyrmashylyǵyn qysqartý úshin aýyl mektepterine qoldaý kórsetý, jobanyń júzege asyrylýyn monıtorıngileý jáne baǵalaý. Jobany júzege asyrý aıasynda pedagog kadrlardy daıyndaıtyn 16 JOO 166,7 mln teńgege robototehnıkalyq zerthanamen jabdyqtaldy. Sonymen qatar 2020 jyly jalpy somasy 686,6 mln teńgege 7 kelisimshart jasasý josparlanǵan. Onyń ishinde 656mln teńge bilim berý mazmunyn jańartý, qashyqtan oqytýdy monıtorıngileý, oqýdy baǵalaý júıesin jetildirý sharalaryn ótkizýge baǵyttalady»,- dedi Úkimet basshysy.
Premer-Mınıstrdiń atap ótýinshe, Bilim jáne ǵylym mınıstrliginiń aqparatyna sáıkes, osy jyldyń 29 shildesindegi depýtattyq saýalǵa jaýap 2020 jyldyń 8 qyrkúıeginde hatpen jiberilgen.
«Sizderdiń saýaldaryńyzǵa der ýaqytynda jaýap usynbaǵany úshin mınıstrliktiń Bilim berýdi tsıfrlyq transformatsııalaý departamentiniń dırektory tártiptik jaýapqa tartyldy. Buǵan qosa, qazirgi ýaqytta Qarjy mınıstrliginiń Іshki memlekettik aýdıt komıteti 2016 jyldan bólingen qarajattyń paıdalanylýyna aýdıt nysanyn, sonymen qatar buǵan deıin júrgizilgen aýdıt is-sharalarynyń nátıjelerin aldyn ala zerdelep jatyr. Ol aıaqtalǵannan keıin tıisinshe aýdıtorlyq is-shara taǵaıyndalady. Tekserý qorytyndysy týraly sizderge mınıstrlik pen esep komıteti qosymsha aqparat beretin bolady. Jalpy, sizder kótergen másele Úkimettiń turaqty baqylaýynda», - dedi Asqar Mamın.
Buǵan deıin Respýblıkalyq bıýdjettiń atqarylýyn baqylaý jónindegi esep komıteti joǵaryda atalǵan máseleler boıynsha Bilim jáne ǵylym mınıstrliginiń shyǵystaryna aýdıt júrgiziletindigin málimdegen edi.
