Depýtattar saýalyna memorgandardyń bergen jaýaby kóńilden shyqpaıdy
ASTANA. KAZINFORM – Depýtattar memlekettik organdarǵa 625 saýal joldady. Bul týraly Parlament palatalarynyń birlesken otyrysynda Májilis tóraǵasy Erlan Qoshanov aıtty.
- Depýtattyq saýaldarǵa beriletin jaýaptar máselesin de arnaıy aıta ketkim keledi. Osy sessııa barysynda memlekettik organdarǵa 625 saýal joldandy. Ár saýaldyń artynda halyqty tolǵandyratyn másele turatyny belgili. Alaıda olarǵa berilgen jaýaptardyń mazmuny men sapasyna kóńil tola bermeıdi. Taǵy da jańa suraqtar týyndatady. Bul jaǵdaı keıde depýtattardy memlekettik organǵa qaıta júginýge májbúr etedi. Biz Úkimetpen birge osy máselelerdi júıeli sheshýimiz kerek. Kelesi sessııada Úkimet múshelerin arnaıy shaqyryp, joǵaryda aıtylǵan máselelerdi talqylaý josparymyzda bar, - dedi Erlan Qoshanov.
Májilis tóraǵasv memlekettik organdar men depýtattyq korpýstyń birlesken jumysynyń jaqsy úlgileri de bar ekenin aıtty.
- Mysaly, aýyl halqynyń tabysyn arttyrýda, ınfraqurylymdyq jobalardy iske asyrýda, aýyl ákimderin oqytýda jáne azamattardyń shamadan tys qaryz alýy problemalaryn sheshýde ortaq jumysymyzdan eleýli nátıje kórip otyrmyz. Saılaýshylardyń talap-tilekteri boıynsha Úkimet esebin tyńdaýǵa arnalǵan otyrystarymyz da óz tıimdiligin kórsetip jatyr. Óńirlerge saılaýshylarmen kezdesýge barǵan saıyn depýtattar halyqtyń bir jarym myńnan astam máselesi men amanatyn arqalap keledi. Osy sessııada Parlament depýtattary 500-den asa eldi mekenge baryp, azamattarmen 1 200 kezdesý ótkizdi. Onda kóterilgen barlyq másele Úkimet aldyna qoıyldy. Biz olardy burynnan qalyptasqan tájirıbe boıynsha, arnaýly jalpy otyrysta talqyladyq, - dedi ol.
Aıta keteıik, búgin Parlament palatalarynyń birlesken otyrysy ótip, onda segizinshi saılanǵan Parlamenttiń úshinshi sessııasy resmı túrde jabyldy.