Depýtattar radıatsııadan lastanǵan aýmaqtardy ońaltý máselesin kóterdi

ASTANA. QazAqparat – Májilis depýtaty Nurlan Áýesbaev Semeı polıgonyndaǵy ıadrolyq synaqtardyń saldarynan zardap shekken azamattardy áleýmettik qorǵaý máselesin kóterdi, dep habarlaıdy QazAqparat tilshisi.

«Bul aımaqqa orny tolmas ekologııalyq zalal keltirildi. Bizdiń aldymyzda áli kúnge deıin sheshimin tappaǵan máseleler bar. Bizdiń elimizdiń aýmaǵynda polıgon qyzmetiniń nátıjesinen zardap shekkenderdiń sany týraly naqty derek áli joq. Túrli aqparat boıynsha 1,5 mıllıonnan astam adam zardap shekken. Polıgonǵa jaqyn ornalasqan eldi mekenderdiń turǵyndary radıatsııadan bolǵan aýrýlardan zardap shegip otyr», - dedi N. Áýesbaev Úkimet basshysy Álıhan Smaıylovtyń atyna joldaǵan saýalynda.

Onyń aıtýynsha, Japonııada ıadrolyq bombadan zardap shekkenderge aı saıyn atom radıatsııasymen baılanysty aýrýlardy emdeý úshin arnaıy medıtsınalyq tólem, densaýlyqty baqylaý tólemi, densaýlyqty jaqsartý tólemi, medbıkeni jaldaý boıynsha kútim tólemi eskerilgen. Olardyń somasy 1000 dollardan asady.

«Buǵan deıin Úkimet 2017-2019 jyldar aralyǵynda polıgon saldarynan zardap shekken adamdardy jáne olardyń urpaqtaryn medıtsınalyq-áleýmettik qorǵaý qaǵıdatyn iske asyrý úshin zertteý júrgizilgenin, sondaı-aq osy zertteýdiń nátıjesi boıynsha tıisti usynystar ázirlep, sheshim qabyldanatynyn habarlaǵan. Alaıda, bul zertteýdiń nátıjesi usynys deńgeıinde qaldy. Bul zertteýge bıýdjetten sáıkes qarajat jumsalǵanyn atap ótkim keledi. 2021 jyly ázirlengen tásilderdi talqylaý jáne naqty usynystar engizý úshin múddeli memlekettik organdar ókilderiniń qatysýymen Vedomstvoaralyq jumys toby qurylatyny jáne azamattarǵa ataýly áleýmettik qoldaý kórsetýge kóshýdi dáıekti iske asyrý jónindegi tásilder ázirlenetini habarlandy. Degenmen, jumys nátıjelerin kórmeı otyrmyz», - dedi depýtat.

Baıandalǵannyń negizinde Jalpyulttyq sotsıal-demokratııalyq partııasynyń fraktsııasy myna usynystardy jasady:

- áleýmettik qoldaý sharalaryn jetildirý boıynsha naqty usynystar ázirleý;

- ıadrolyq synaqtardyń saldarynan zardap shekken azamattardy personaldy esepke alýdy qamtamasyz etý;

- ıadrolyq synaqtardyń saldarynan zardap shekken azamattardyń sanattaryn aıqyndaý ólshemsharttaryn qaıta qaraý;

- vedomstvoaralyq jumys tobynyń nátıjelerin usyný;

- radıatsııadan lastanǵan aýmaqtardy ońaltý.

Budan buryn habarlanǵandaı, jaqynda Májilis depýtaty Nurtaı Sabılıanov polıgonnan zardap shekken azamattarǵa beriletin ústemeaqylardyń barlyq túrlerin eki esege ulǵaıtý jáne jyl saıynǵy qosymsha eńbek demalysyna aqy tóleýge memlekettik qoldaý kórsetýdi usyndy.