Depýtattar Prezıdent jarııalaǵan bes reformany júzege asyrýǵa belsendi qatysady - Májilis spıkeri

ASTANA. QazAqparat - Depýtattyq korpýs Prezıdent jarııalaǵan bes reformany júzege asyrýǵa belsendi qatysady. Bul týraly búgin Parlament Májilisiniń jalpy otyrysynda palata Tóraǵasy Qabıbolla Jaqypov málim etti.

«Keshe Elbasy Úkimettiń keńeıtilgen otyrysyn ótkizip, onda Jańǵyrtý jónindegi ulttyq komıssııanyń birinshi kezekte atqaratyn mindetterin belgilep, naqty tapsyrmalar júktedi. Ol komıssııanyń mindeti - jarııalanǵan bes halyqtyq reformany kezeń-kezeńimen júzege asyrýdy basqarý, osy baǵyttaǵy memlekettik organdardyń, bıznes sektory men azamattyq qoǵamnyń qyzmetterin úılestirý. Bul baǵyttaǵy jumystarǵa birqatar depýtattar qatysatyn boldy, olar belsendi jumystar atqarmaq», - dedi Q. Jaqypov.

Spıker budan bólek, Ulttyq komıssııa tarapynan usynystar ázirlengenin, ondaı usynystar Prezıdenttiń maquldaýynan ótkennen soń jarııalanatynyn jetkizdi.