Depýtattar poıyz dáretxanalaryn synǵa aldy
ASTANA. QazAqparat - Parlament Májilisiniń depýtattary poıyzdardyń sanıtarlyq jaǵdaıyn synǵa aldy, dep xabarlaıdy QazAqparat tilshisi.
«Aýyl» partııasynyń ókili Farıd Aqberdıevtiń aıtýynsha, eski vagondardyń ishi syn kótermeıdi. Dáretxananyń ishi sasyq, sabyn men qaǵaz joq.
«Jerde sý, tazalyq jumystaryn júrgizbeıdi. Kondıtsıoner istemeıdi. Perdeler kir-kir, oǵan qoldaryn súrtetin sııaqty. Anaý perdeni ustaıtyn sym da shyǵyp kete beredi. Balyq sata ma, ishki kıim sata ma, vagon emes, bazar sııaqty. Jolserikter trıkomen júredi. Osyny tekseretin bireý bar ma? Jaýapty tulǵalar ushaqpen qatynaıdy ǵoı. Poıyzben júrýge jıirkenetin shyǵar. Men jol bóliminiń bastyǵy júretin vagondy kórdim. Іshi tap-taza, bári bar. Memleket basshysy júretin vagon sııaqty. Mınıstrler sonymen júretin shyǵar», - dedi F.Aqberdıev ekonomıkalyq reforma jáne óńirlik damý komıtetiniń otyrysynda.
QR Investıtsııalar jáne damý mınıstrligi kólik komıtetiniń tóraǵasy Áset Asavbaevtyń aıtýynsha, respýblıka boıynsha 2000 vagon jolaýshylardy tasymaldaýǵa arnalǵan. Alaıda sonyń basym bóligi eskirgen. Búginde jekemenshik kompanııalar vagondardy birtindep jańartyp keledi. Degenmen, keıbir tasymaldaýshylar sanıtarlyq normalardy buzyp otyrady. Sol úshin aıyppuldar da salynady.
«Osy ýaqytqa deıin 57 mln teńgeniń aıyppuly salyndy. Árıne, onymen barlyq máselelerdi sheshe almaımyz. Bizge vagondardy barynsha jańartý qajet», - deıdi Á.Asavbaev.
Depýtat Nurtaı Sabılıanov ta poıyzben júrýdiń mashaqatyn jetkizdi.
«Men qysta Aıagózden Almatyǵa kelgende 20 vagon boldy. Sonda bar-joǵy 2-aq dáretxana istep turdy. 40 gradýs sýyq, kishkentaı balalar bar. Vagonda sýyq sý da bolmady», - dep atap kórsetti N.Sabılıanov.
Aıta keteıik, Parlament Májilisiniń depýtattary kólik máseleleri boıynsha keıbir zańnamalyq ózgeristerdi talqylaýǵa kiristi. Sonyń ishinde respýblıkalyq joldarda kólik quraldaryn jappaı toqtatý tájirıbesine tyıym salý máselesi de bar.
Budan bólek, Uber, InDriver men ıAndeks Taksı sııaqty mobıldi qosymshalar boıynsha adam tasıtyn kólik júrgizýshilerin zańdastyrý sharalary qolǵa alynady.
