Depýtattar osy aptada ne isteıdi
ASTANA. QazAqparat - Ortalyq kommýnıkatsııalar qyzmetiniń resmı ókili Murat Jumanbaı Senat pen Májilistiń osy aptadaǵy jumys kestesin jarııalady, dep xabarlaıdy QazAqparat tilshisi.
Onyń aıtýynsha, erteń, sáýirdiń 11-i kúni Parlament Senatynda áýe keńistigin paıdalaný jáne avıatsııa máseleleri jónindegi zańnamaǵa ózgerister engizý jaıy qaralady. "Dál osy kúni Senattyń áleýmettik-mádenı damý jáne ǵylym komıtetiniń "Qazaqastan Respýblıkasynyń keıbir zańnalyq aktilerine mádenıet máseleleri boıynsha ózgerister men tolyqtyrýlar engizý týraly" zań jobasy jónindegi keńeıtilgen otyrysy ótedi dep josparlanýda. Osy kúni joǵary palatanyń ekonomıkalyq saıasat, ınnovatsııalyq damý jáne kásipkerlik komıtetiniń "100 naqty qadam" Ult jospary aıasynda "Azamattarǵa arnalǵan úkimet" memlekettik korporatsııasyn qurý máseleleri boıynsha QR Aqparat jáne kommýnıkatsııalar mınıstrliginiń basshylyǵymen kezdesýi bolady", - dep atap kórsetti Jumanbaı.
Parlament Májilistiń xalyqaralyq ister, qaýipsizdik jáne qorǵanys komıtetinde "QR Memlekettik qyzmeti týraly" zańnyń oryndalý barysyna arnalǵan "dóńgelek ústel" ótedi. Qarjy jáne bıýjet komıtetinde memlekettik bilim berýdiń jınaqtaý júıesine arnalǵan otyrys uıymdastyrylady.
Al sáýirdiń 12-si kúni Májilistiń jalpy otyrysynda depýtattar kólik máselelerin birinshi oqylymda qaraıdy. Ekinshi oqylymda qorǵanys, áskerı qyzmet, sondaı-aq ósimdik pen janýarlar álemine qatysty zań jobalary qaralatyn bolady. Sonymen qatar, palata Islam konferentsııasyna múshe memleketter arasyndaǵy ekonomıkalyq, texnıkalyq jáne saýda yntymaqtastyǵy týraly bas kelisimdi qaraıdy.
Al beısenbi, sáýirdiń 13-i kúni Májilistiń agrarlyq komıtette Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlarǵa arnalǵan zań jobasy tanystyrylady.
