Depýtattar ósimdikter karantıni týraly zańnamany jetildirýdi qolǵa aldy
ASTANA. QazAqparat - Búgin Májiliste ósimdikter karantıni týraly zańnamany jetildirýge baǵyttalǵan jumys tobynyń alǵashqy otyrysy bolyp ótti.
Agrarlyq máseleler komıtetiniń múshesi, jumys tobynyń jetekshisi Álıhan Toıbaev depýtattardan kelip túsken usynystar men tolyqtyrýlar Salystyrma kestege engizilgenin málimdedi. Jumys tobynyń músheleri zań jobasyn Salystyrma kestege engen baptar boıynsha jeke-jeke qarady.
Keıbir baptar boıynsha Aýyl sharýashylyǵy mınıstrliginiń ókilderi jaýap berdi.
Jumys tobynyń otyrysyna qatysqan Májilis depýtattary Shalataı Myrzahmetov, Ýálıhan Bıshimbaev, Egor Kappel, Serik Seıdýmanovtar salystyrma kestege engizilgen túzetýlerdi sarapqa saldy.
Búgingi tańda salystyrma kestege salalyq komıtetter men depýtattar usynǵan 20 túzetý engizilgen.
Aıta ketý kerek, «Ósimdikter karantıni týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy Úkimetten Májiliske ústimizdegi jyly 29 tamyz kúni kelip túsken bolatyn.
Qazaqstan Prezıdentiniń 2010 jylǵy 29 sáýirdegi Jarlyǵyna sáıkes Qazaqstan Respýblıkasy Ósimdikter karantıni jáne olardy qorǵaý jónindegi halyqaralyq konventsııaǵa qosyldy, soǵan sáıkes ósimdikter karantıni jáne olardy qorǵaý salasyndaǵy negizgi is-sharalardyń biri mindetti túrde fıtosanıtarııalyq táýekelge taldaý júrgizý bolyp tabylady.
Qazaqstanda fıtosanıtarııalyq táýekelge taldaý júrgizý jónindegi atalǵan memlekettik mekemeni qurý kórsetilgen salada halyqaralyq talaptarǵa sáıkes bolýǵa múmkindik beredi.
«Zań jobasynda ósimdikter karantıni jónindegi is-sharalardy júrgizý úshin ýákiletti organnyń pestıtsıdterdiń zapasyn jasaý tártibin ázirleý jáne bekitý boıynsha quzyretin keńeıtý kózdelip otyr. Sondaı-aq jeke jáne zańdy tulǵalardyń menshigindegi obektilerde, sondaı-aq jer ýchaskelerinde karantındi aramshópterge qarsy ósimdikter karantıni boıynsha is-sharalardy menshik ıeleri men jer paıdalanýshylardyń qarajaty esebinen júrgizý qarastyrylǵan. Qazir depýtattar zań jobasyn jan-jaqty talqylaý ústinde. Óz usynystaryn berip jatyr. Búginge deıin Agrarlyq máseleler, Qarjy jáne bıýdjet komıtetteri jáne Zańnama bólimi, sondaı-aq jekelegen depýtattar óz túzetýlerin berdi»,- dedi depýtat, jumys tobynyń jetekshisi Álıhan Toıbaev.
