Depýtattar oryndalyp júrgen ánderdiń deńgeıine baǵa beretin Keńes qurýdy usyndy
ASTANA. QazAqparat - Búgin Májilistiń jalpy otyrysynda QR Premer-Mınıstriniń orynbasary Imanǵalı Tasmaǵambetovtiń atyna depýtattyq saýal joldaǵan Káribaı Musyrman Mádenıet jáne sport mınıstrliginiń janynan án óneri boıynsha kórkemdik keńes qurý usynysyn jasady, dep habarlaıdy QazAqparat.
«Halqymyzdyń án óneriniń ózekti máselelerin sheshý maqsatynda birqatar usynystar jasaımyz. ıAǵnı Mádenıet jáne sport mınıstrliginiń janynan án óneri boıynsha kórkemdik keńes qurý qajet. Onyń quramyna elimizge belgili óner qaıratkerleri engizilgeni jón. Kórkemdik keńes kópshilik sahnalarda oryndalatyn jáne teleradıo arnalary arqyly taratylatyn ánderdiń, áýender men óleńderdiń kásibı deńgeıin baǵalaýǵa, sondaı-aq halyq ánderi men áıgili kompozıtorlardyń ánderin burmalaýǵa jol bermeýdi qadaǵalaýǵa tıisti»,-dedi K. Musyrman.
Onyń paıymynsha, jańa ánder jazýda belgili kompozıtorlar men aqyndar arasynda tyǵyz shyǵarmashylyq baılanysty ornatý kerek. Telearna men radıo arqyly halyq ánderin, halyq kompozıtorlarynyń asyl muralaryn jáne osy zamanǵa belgili kompozıtorlardyń shyǵarmalaryn keńinen nasıhattaý qajet.
«Dástúrli ánderdi oryndaıtyn daryndy ánshilerdiń elimizdiń úlken qalalarynyń sahnalarynda jeke kontsertterin júıeli uıymdastyrý, sondaı-aq dástúrli ánder oryndaýshylardyń óńirlik jáne respýblıkalyq baıqaýlaryn ótkizý qolǵa alynsa, nur ústine nur», - dedi depýtat.
