Depýtattar orman salasyndaǵy zańbuzýshylyqtardy tekserýdi surady
ASTANA. QazAqparat - Májilistiń jalpy otyrysynda elimizdegi ormandy alqaptarynyń zańsyz kesilý máselesi kóterildi. Osy oraıda bir top depýtat QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeevtiń atyna depýtattyq saýal joldady, dep habarlaıdy QazAqparat.
«Búginde Qazaqstanda ormannyń aýmaǵy 4,6 alty paıyzdy ǵana quraıdy. Sondyqtan osyndaı az ormandy alqapty qorǵaý biz úshin asa mańyzdy bolyp tabylady. Elbasymyz osy máselege erekshe nazar aýdaryp, Astana qalasynyń aınalasyn jasyl jelekke aınaldyrý týraly bastamasy qolǵa alyndy. Bul negizinen Aqmola oblysynda, onyń ishinde Býrabaı men Zerendini týrıstik klasterge aınaldyrý aıasynda júzege asyrylady. Osyndaı mańyzdy jobalar qolǵa alynyp jatsa da, Býrabaı men Zerendiniń ormanyn zańsyz otaý azaıatyn emes. Bir jas kóshetti otyrǵyzyp, ósirý úshin ondaǵan jyldar qajet. Biraq orman jaýlary muny nazarǵa da almaıdy. Sebebi olarǵa aǵash kesý quqyǵyn berip otyrǵan da ózińizge qarasty memlekettik organdar. Bul qaskúnemdikti dereý toqtatý kerek», - dedi depýtat Merýert Qazbekova.
Onyń sózine qaraǵanda, ótken jyldyń ózinde Aqmola oblysynda 110 zańsyz aǵash kesý faktisi tirkelip, otyz myńdaı sharshy metrdiń aǵashy zańsyz otalǵan.
«Jaqynda bizdiń partııa fraktsııasyna Zerendi aýdany, Qanaı bı aýylynyń 75 turǵyny qol qoıǵan hat kelip tústi. Onda «Kishi Túkti» orman sharýashylyǵynyń toǵyz myńdaı gektar orman qory alqaby «Jasyl aǵash» seriktestigine aǵash kesip, daıyndaý úshin 49 jylǵa paıdalanýǵa zańsyz berilgeni anyqtaldy. Jergilikti turǵyndarmen qoǵamdyq tyńdaý ótkizilmegen. Mundaı oqıǵa Býrabaı aýdanyna qarasty Qarabulaq aýylynda da oryn alyp otyr. Kesilgen aǵashtyń ornyna jas kóshetter otyrǵyzý baǵytynda da jumystar joq deýge bolady. Bulaı aǵashty otaı bersek, osyndaı az baılyǵymyzdan aıyrylyp kalamyz. Elimizde týrıstik klasterdi júzege asyrý bastamasynyń tamyryna da balta shabylýy múmkin», - dedi M. Qazbekova.
Osy oraıda «Aq jol» fraktsııasynyń depýtattary Aqmola oblysynyń orman salasyndaǵy zańbuzýshylyqtardy jan-jaqty tekserýdi, sondaı-aq qatań shara qoldanýdy surady.
