Depýtattar Ońtústik Qazaqstan oblysy ákiminiń jumysyn oń baǵalady
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev oblystyq máslıhattyń kezekti XIV sessııasynda bıylǵy jyldyń 7 aıynda atqarylǵan jumystar boıynsha esep berdi, dep habarlaıdy QazAqparat óńir basshysynyń baspasóz qyzmetine silteme jasap.
Onda eń aldymen qańtar-shilde aılarynda atqarylǵan jumystar boıynsha 15 mınýttyq vıdeorolık kórsetilip, barlyq depýtattarǵa oblystyń áleýmettik-ekonomıkalyq damýy jaıy baıandalǵan kitapsha úlestirildi.
2017 jyldyń jeti aıynyń qorytyndysymen oblysta mańyzdy áleýmettik-ekonomıkalyq kórsetkishterdiń ósimi saqtalǵan. Máselen, osy ýaqyt ishinde oblysta 439,1 mlrd. teńgeniń ónerkásip ónimi óndirildi, bul ótken jyldyń sáıkes kezeńimen salystyrǵanda 0,3 paıyzǵa kóp. Al ónerkásip salasyndaǵy óńdeý ónerkásibi 301,3 mlrd. teńgeni qurap, 34,6 mlrd. teńgege artqan.
Baıandamada kórsetilgendeı, osy jyly negizgi kapıtalǵa 229,9 mlrd. teńge ınvestıtsııa tartylyp, bul respýblıkadaǵy úlesiniń 5,7 % quraǵan. Óńirge kóptep ınvestıtsııa tartý maqsatynda jyl basynan beri shetel ınvestorlarymen 40-tan asa iskerlik kezdesýler uıymdastyryldy. Nátıjesinde, BAÁ-de - medıtsınalyq buıymdar jáne dárilik zattar shyǵaratyn zaýyt salý, Reseı elimen - Evro-5 standartyna saı janar-jaǵarmaı óndiretin munaı óńdeý zaýytyn salý, al Qytaı elimen birlese bıoetalon, fosfor tyńaıtqyshyn shyǵaratyn jáne 200 MVt kún elektr stansasy qurylystaryn júrgizý kelisimderi jasaldy.
Respýblıka boıynsha shaǵyn jáne orta bıznes (ShOB) sýbektileriniń sany jaǵynan kósh bastaıtyn ońtústikte búginde jumys istep turǵan ShOB sýbektileri 177 709-ǵa jetti. Al bul salada jumyspen qamtylǵandar 331 490 adamdy qurady. Olarmen 158,3 mlrd. teńgeniń ónimi óndirilgen.
Sonymen qatar, ońtústikte osy jyly 52 myńǵa jýyq jeke fermerlik qojalyqtardan biriktirilgen 297 kooperatıv qurylyp, 539-ǵa jetti. Ótken jylǵa qaraǵanda eki ese artqan kooperatsııa qurý jumystary boıynsha Ońtústik Qazaqstan oblysy respýblıkada kósh bastap otyr.
Sessııada óńir basshysynyń jumysyn oń baǵalaǵan halyq qalaýlylary aýdan, qalanyń damýy jáne turǵyndardyń ál-aýqatyn jaqsartý baǵytynda usynystary men ózekti máseleler boıynsha suraqtaryn qoıdy.
Jıyndy qorytyndylaǵan oblys ákimi J.Túımebaev Memleket basshysynyń kóregendik saıasatynyń arqasynda oblystyń damýy úshin barlyq múmkindikter jasalynǵanyn aıtyp, óńirdiń áleýmettik-ekonomıkalyq damý baǵytyndaǵy jumystardy júzege asyrýda birlese jumys isteýge shaqyrdy. Sondaı-aq, ákim aımaq halqynyń turmys-tirshiligi jaqsaryp, alǵa qoıǵan mindetter oryndalyp jatqanyn jáne osy baǵyttaǵy jumystar álide jalǵasyn tabatynyn jetkizdi.
