Depýtattar onlaın-kredıt berýge tyıym salýdy usyndy
NUR-SULTAN. QazAqparat – Jyl saıyn mıkroqarjy uıymdarynda problemalyq qaryzdar úlesi artyp keledi. Mıkroqarjy uıymdarynyń portfelindegi problemalyq qaryzdar kólemi 914 myńdy nemese jartysynan astamyn quraıdy. Bul týraly Májilis depýtaty Dánııa Espaeva aıtty, dep habarlaıdy QazAqparat tilshisi.
Depýtat búgin Májiliste «Jeke tulǵalardyń bankrottyǵy týraly» zań jobasyn qarastyrýdy bastaǵanyn eske saldy.
«Bankrottyq – máseleniń saldary ekenin este ustaǵan jón, al onyń sebebi basqada jatyr. Halyq tabysynyń tómen bolýy, paıyzdyq mólsherlemelerdiń shamadan tys joǵary bolýy jáne jeke tulǵalarǵa nesıeniń tym qoljetimdi bolýy bankrottyqqa ákep soǵady. Halyqtyń negizgi bóliginiń tabysynyń tómendigi olardy baspanany jalǵa alý, balalardy oqytý, basqa bankte aı saıyn nesıe tóleý, azyq-túlik jáne basqa da qajettilikter úshin onlaın-qaryz alýǵa májbúr etedi. Kepilsiz qaryz tez jáne tabys deńgeıin eskermeı berilýi, joǵary paıyzdyq mólsherleme túrindegi syn-qater halyqtyń jappaı kredıttelýine yqpal etedi», - dedi D. Espaeva Májilistiń jalpy otyrysynda.
Onyń aıtýynsha, «Aq jol» fraktsııasynyń depýtattary mıkrokredıtter boıynsha jyldyq tıimdi syıaqy mólsherlemesin jyldyq 56%-dan aspaıtyn soma men merzimge shekteýsiz belgileýdi usynǵan. Qarjy naryǵyn baqylaý men retteý agenttigi bul bastamany qoldaǵan.
Sondaı-aq, D. Espaeva fraktsııanyń «Mıkroqarjy qyzmeti týraly» Zańǵa mıkrokredıt boıynsha artyq tólemniń shekti mólsherin eki esege – mıkrokredıt somasynyń 100%-ynan 50%-yna deıin tómendetý boıynsha túzetýlerge qol jetkizgenin aıtty.
Májilis depýtatynyń aıtýynsha, halyqtyń qaryz tuzaǵyna túsýiniń negizgi sebebi – joǵary paıyzdar bolyp otyr, sonyń saldarynan olar óz múlkinen, sonyń ishinde jalǵyz baspanasynan aıyrylýy múmkin.
«Mıkroqarjy uıymdaryndaǵy problemalyq qaryz úlesi jyl saıyn ósip keledi. 2022 jylǵy naýryzdaǵy jaǵdaı boıynsha 1 212 myń qaryzdyń 435 myńy problemalyq bolǵan. Merzimi ótken qaryzdar – 479 myń qaryz alýshy nemese jartysynan astamy kollektorlyq kompanııalarǵa satyldy. Osylaısha, mıkroqarjy uıymdarynyń portfelindegi problemalyq qaryzdardyń jalpy sany 914 myń nemese jartysynan astamyn quraıdy. Qazir ulttyq ekonomıkany nesıelendirýdi qysqartý, jumys oryndary men halyq tabysynyń ósýin tejeý júrip jatyr. Jeńil bolyp kórinetin ınternettegi nesıe berýdiń aıla-amaldary da adamdardy quldyqqa ıtermeleýde. Bul «Jeke tulǵalardyń bankrottyǵy týraly» zańnyń qabyldanýyn qajet etti», - dedi Dánııa Espaeva.
Osyǵan baılanysty «Aq jol» fraktsııasynyń depýtattary onlaın-kredıtteýge tyıym salýdy usyndy.
