Depýtattar munaı men munaı ónimderin urlaǵandarǵa, onyń zańsyz tasymaly men satylýyna baılanysty jazany kúsheıtýdi kózdep otyr

Onda depýtattar «QR keıbir zańnamalyq aktilerine munaı jáne munaı ónimderiniń aınalymy salasynda memlekettik baqylaýdy kúsheıtý máseleleri boıynsha ózgerister men tolyqtyrýlar engizý týraly» zań jobasyn talqylady, dep habarlaıdy QazAqparat.

Atalǵan zań jobasyna Májilis depýtattary «Nur Otan» HDP basshylyǵynyń tapsyrmasy boıynsha bastamashylyq jasaǵan bolyp otyr. «Tasymaldaýshy kompanııalar tarapynan munaı magıstraldy qubyrlaryna qatysty kúzettiń kúsheıtilgen sharalaryna qaramastan, qazirgi kúni jaǵdaı kúrdelenip otyr. Tipti, keıbir qolda bar málimetterge qaraǵanda munaı men munaı ónimderiniń zańsyz aınalymy boıynsha iri qylmystyq toptar áreket etip, olardyń ónimdi ótkizý arnalary da jasaqtalyp, bundaı qylmystardy jasaýǵa «urylar» ákkilenip alǵan. Urlanǵan munaılar munaı termınaldary arqyly satyp alynyp, keıinnen zańsyz jolmen qaıta satylatyn bolyp otyr. Osyǵan oraı, zań jobasynda munaı men munaı ónimderiniń zańsyz tasymaly, ıelengeni, satqany, saqtaǵany jáne óńdegeni úshin ákimshilik-qylmystyq jaýapkershilikti qoldaný sharalary kózdeledi. Budan basqa qubyrlardan munaı urlaǵany, qylmystyq jolmen munaı ónimderin ıelengeni úshin jaýapkershilikti qataıtý qarastyrylady», dedi zań jobasyna bastamashylyq jasaǵan depýtattardyń biri Valerıı Kotovıch. Onyń aıtýyna qaraǵanda bul jobaǵa Úkimet tarapynan da oń qorytyndylar berilip otyr.

Toqtala ketetin jaıt, qazirgi qoldanystaǵy zańnamalarda bundaı urlyqtarǵa qatysty qylmystyq jaýapkershilikter de qarastyrylǵan. «Alaıda, qoldanystaǵy zańnamada munaıǵa qatysty bul másele «avtokólikter jáne basqa da urlyq quraldary» dep qana kórsetilgen. ıAǵnı, munaı qubyrlarynan ónimder urlanǵanda, qylmyskerlerdiń barlyǵy osy bap boıynsha aıyptalady, onyń úkimi de jeńil bop shyǵady. Sondyqtan da biz bul jerde naqty «munaı jáne munaı ónimderi» dep kórsetip otyrmyz», dedi depýtat.