Depýtattar munaı aınalymyn memlekettik baqylaý jónindegi zańnyń oryndalýyn ózderi baqylaǵany durys - Z. Balıeva

Búgin QR Parlamenti Májilisiniń jalpy otyrysynda palata depýtattary «Qazaqstan Respblıkasynyń keıbir zańnamalyq aktilerine munaı jáne munaı ónimderiniń aınalymy salasynda memlekettik baqylaýdy kúsheıtý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Zaǵıpa Balıeva osyndaı másele kóterdi, dep habarlaıdy QazAqparat.

Depýtattyń aıtýynsha, qoldanystaǵy Qylmystyq kodekste 172-i, 175-i, 183-i baptar bar. Bul baptar munaı qubyrlaryna zańsyz oıyq salyp, urlaýshylardy jaýapkershilikke tartýdy tolyq qamtamasyz ete alar edi.

«Alaıda, búgingi kúni maquldanyp otyrǵan zań jobasy bundaı qylmystyń jaýapkershiligin kúsheıte túsedi. Osynyń ózi de qujattyń jańalyǵy bolyp otyr. Degenmen de, bundaı qylmysqa qatysty jaýapkershilikti kúsheıtip, oǵan qosymsha sharalardy qarastyra bergennen góri onyń durys oryndalýyn qadaǵalaý mańyzdy bolyp otyr. ıAǵnı, bundaǵy basty másele quqyq qoldaný tájirıbesine baılanysty», dedi Z. Balıeva.

Sonymen birge, depýtat munaı qubyrlaryna oıyq salý arqyly jasalatyn munaı urlyǵyna qatysty birqatar málimetterdi alǵa tartty. Onyń aıtýynsha, munaı urlyǵyna qatysty 2005 jyly 43 qylmys tirkelgen bolsa onyń tek 2-eýine ǵana qylmystyq is qozǵalypty. Al 2006 jyly 45 munaı urlyǵy jasalyp, tek 1 ǵana is qozǵalǵan, 2007 jyly - 74 urlyq bolyp, 2-ýine ǵana is qozǵalǵan. 2008 jyly - 131 munaı urlyǵy oryn alsa, onyń 8 faktisine ǵana qylmystyq is qozǵalypty, al 2009 jyly - 148 urlyq jasalyp, sonyń 5-eýine ǵana qylmystyq is qozǵalǵan.

«Jalpy, jaýapkershilikti kúsheıtken de durys. Degenmen, bunda negizinen quqyq qoldaný tájirıbesine basa mán bergen oryndy. Sondyqtan da, depýtattar ózderi bastamashylyq jasaǵandyqtan bul zańnyń oryndalýyn da ózderi qadaǵalaýǵa alsa ıgi», dedi Z. Balıeva.