Depýtattar monoqalany damytý baǵdarlamasynyń oryndalýyn synǵa aldy
ASTANA. QazAqparat - Búgin Májilistegi «Nur Otan» partııasy fraktsııasy janyndaǵy Óńirlik saıasat jáne máslıhattarmen jumys jónindegi keńestiń otyrysynda monoqalalardyń damý máselesi talqylanyp, depýtattar osy baǵyttaǵy baǵdarlamaǵa birqatar syn aıtty.
Halyq qalaýlylarynyń pikirinshe, monoqalalardy damytý baǵdarlamasyn tıimdi júzege asyrýda úılesimdilik jetispeıdi. Máselen, depýtat Serikjan Qanaevtyń aıtýynsha, bul jumysty buǵan deıin óńirlik damý mınıstrligi úılestirgen. Al qazir baqylaýshy organdardyń pozıtsııasyn ákimdikter ıelenip alsa, monoqalalardy damytý másedesimen aınalysatyn jaýapty tulǵa barlyq jerde birdeı taǵaıyndalmaǵan.
«Biz arnaıy saraptama jasap baqyladyq, sońǵy 2 jylda 27 monoqalalardyń 23-inde ákim aýysty, sonyń ishinde 7 qalada ákimder úsh márte aýysyp úlgerse, Arqalyq, Jezqazǵan men Sátbaev qalasynyń basshylary tórt retten aýysty. Sonda baǵdarlamanyń tıimdiligi týraly qandaı sóz bolýy múmkin? Ony kim qadaǵalap, baqylaıdy?», - dedi Májilis depýtaty.
Onyń sózine qaraǵanda, 11 monoqalaǵa 16 jobany júzege asyrý úshin respýblıkalyq bıýdjetten 1,2 mlrd teńge bólingen. «Qazan aıynyń málimetterine qaraǵanda, sonyń 800 mln. teńgesi ǵana ıgerilipti, qalǵan 800 mln. teńge ıgerilmegen. Bul baǵdarlama boıynsha Almaty, Atyraý, Qostanaı oblystarynda bólingen bıýdjet qarajatynyń «murty da buzylǵan joq». Endeshe, bul rette máseleniń bári ortalyq atqarýshy organdarda emes, bizdiń óńirlerdegi ákimderge de tıisti bolyp otyr. Bu qalaı? Aqsha bólinedi, al jumys eshqandaı qozǵalmaıdy? Baǵdarlama sóz júzinde júzege asyp ta jatyr, al kórsetkishter esh ózgermeıdi», - dedi S. Qanaev.
Depýtattyń aıtýynsha, 12 monoqalada óndiris kólemi artpaq turmaq, kerisinshe túsip ketken. Jumyssyzdyq kórsetkishi de solaı.
