Depýtattar men sýdıalar Azamattyq-protsestik kodekske engiziletin túzetýlerdi talqylady
NUR-SULTAN. QazAqparat - Búgin Nur-Sultan qalalyq sotynda Májilis depýtattary jumys tobynyń kóshpeli otyrysy ótip, onda Azamattyq-protsestik kodekske engiziletin túzetýler talqylady, dep habarlaıdy QazAqparat tilshisi.
Sharaǵa qatysqan Nur-Sultan qalasy Saryarqa aýdandyq sotynyń tóraǵasy Arman Júkenovtiń aıtýynsha, sýdıalar sotqa kelýshiniń quqyqtary anyq buzylǵanyn kórgen onyń qoıyp otyrǵan talaptaryn naqtylaý jáne belgili bir dálelderdi keltirý úshin daıyndyq merzimin uzartyp, protsessýaldyq merzimderdi qalpyna keltirý arqyly kómektesedi.
«Biraq qoldanystaǵy zań boıynsha bul kómek sýdıaǵa berilgen protsessýaldyq quqyqtary aıasynda ǵana kórsetiledi. Tájirıbeden birneshe mysal keltirsem, adam kólik apaty saldarynan keltirilgen zalaldy óndirip alý týraly talap-aryzben sotqa júginedi. Biraq, bul jaǵdaıda ol kólik ıesi, kináli kim ekendigi, saqtandyrý jaǵdaıy, ákimshilik quqyqbuzýshylyq týraly eshqandaı aqparatty bilmeıdi. Ol ózine keltirilgen zııannyń ornyn toltyrǵysy keledi. Sot osy jaǵdaılardyń barlyǵyn zerttemeı jáne qujattardy saraptamaı, jan-jaqty ári ádil sheshim qabyldaı almaıdy. Sondyqtan, isti daıyndaý satysynda sýdıa barlyq materıaldardy óz bastamasy boıynsha talap etýge májbúr. Bul áreketterdi taraptardyń birine artyqshylyq berý retinde qarastyrýǵa bolady. Shyndyǵynda teńdik qaǵıdatyn buzýdy bildiredi», - dedi ol.
Sharaǵa qatysqan QR Joǵarǵy sot azamattyq ister jónindegi sot alqasynyń tóraǵasy Meırambek Taımerdenov ázirlengen zań jobasynyń ózektiligin jáne onyń Memleket basshysynyń sot tóreliginiń sapasyn jaqsartý, azamattardyń sottarǵa senimin arttyrý boıynsha strategııalyq mindetin iske asyrýǵa baǵyttalǵanyn atap ótti.
