Depýtattar men sheneýnikterdiń derekteri qamtylǵan sheteldik saıt buǵattaldy
Tsıfrlyq damý, ınnovatsııalar jáne aeroǵarysh ónerkásibi mınıstrligi elimizdegi depýtattar men vedomstvo basshylarynyń derekteri qamtylǵan sheteldik saıt buǵattalǵanyn málim etti, dep habarlaıdy Kazinform.
«Atap aıtqanda, «rupep.org» ınternet-resýrsynyń fýnktsıonaly Qazaqstan Respýblıkasynyń derbes derekter jáne olardy qorǵaý týraly zańnama talaptaryna sáıkes kelmeıdi. Osyǵan baılanysty Mınıstrlik óz quzireti sheginde Qazaqstan Respýblıkasynyń Mádenıet jáne aqparat mınıstrliginiń Aqparat komıtetine «rupep.org» ınternet-resýrsynyń jumysyn toqtata turý boıynsha habarlama joldady. Osylaısha, «Baılanys týraly» Qazaqstan Respýblıkasy Zańynyń 36-babynyń 1-3-tarmaǵyna jáne 41-1-babynyń 1-1-tarmaǵyna sáıkes, Mádenıet jáne aqparat mınıstrliginiń Aqparat komıteti «rupep.org» ınternet resýrsynyń ashylýyn shekteý boıynsha shara qabyldady», - delingen Tsıfrlyq damý mınıstrliginiń Kazinform agenttigine bergen jaýabynda.
Eske salsaq, bıyl kúzde Májilistiń jalpy otyrysynda depýtat Erbolat Saýryqov ǵalamtordaǵy rupep.org/ru atty saıttyń jumysy boıynsha tekserý júrgizý kerek ekenin tilge tıek etti.
Bul saıtta Qazaqstan Parlamenti depýtattarynyń, vedomstvo basshylarynyń da jeke málimetteri tur. Munymen qosa, olardyń barlyq týystary, jeke sáıkestendirý nómirleri, otbasy músheleri jaıynda aqparat qamtylǵan.
Osy oraıda depýtat bul derekter ary qaraı qylmystyq toptardyń qolyna túsip ketpes úshin mınıstrlik qandaı qadamdar jasaıtynyn suraǵan edi.
