Depýtattar men qoǵam qaıratkerleri «Kóshpendilerdi» radıodan oqýǵa qulshynyp otyr
ASTANA. QazAqparat - Bıyl «Bir el - bir kitap» aktsııasy aıasynda jyl kitaby bolyp tańdalǵan І. Esenberlınniń «Kóshpendiler» romanyn qoǵam qaıratkerleri radıo men teledıdarda oqýlary múmkin. Mundaı usynysty búgin aktsııanyń uıymdastyrý komıssııasynyń otyrysynda UǴA akademıgi Ǵarıfolla Esim bildirdi.
«Qazaq halqy kitapty aýyzsha tyńdaǵandy jaqsy kóredi. Sondyqtan biz el aǵalary retinde osy «Kóshpendilerdi», onyń ishinde «Almas qylyshty» otyryp alyp, radıodan oqıyq. Tipti kerek bolsa, teledıdardan da oqıyq. Bul halyqqa kitapty odan ári jalǵastyryp oqýǵa túrtki bolady», - dedi Ǵ. Esim otyrysta.
Onyń usynysyn jınalysqa qatysqan barlyq qoǵam qaıratkerleri men aqyn-jazýshylar da qoldady.
Aıta keteıik, І. Esenberlınniń «Kóshpendiler» romany «Bir el - bir kitap» aktsııasy aıasynda jyl kitaby bolyp tanyldy. Komıssııa músheleri endigi kezekte kitapty qazaq, orys, aǵylshyn tilderinde qaıtadan basyp shyǵaryp, kópshilikke jetetindeı jaǵdaı týdyrý qajet deıdi.
