Depýtattar memlekettik aqparattyq júıelerdi tolyq túgendeýdi usyndy
ASTANA. KAZINFORM – Májilistegi «AMANAT» partııasy fraktsııasynyń depýtattary Úkimetke memlekettik aqparattyq júıelerdi túgendeý jáne olarǵa baqylaýdy kúsheıtý máselesi boıynsha depýtattyq saýal joldady.
Depýtat Nursultan Baıtilesovtiń aıtýynsha, qazir derbes málimetter, tergeý materıaldary, salyq jáne qarjylyq aqparat saqtalatyn aqparattyq júıelerdiń jaı-kúıi erekshe alańdaýshylyq týǵyzady.
– Kóptegen júıe ártúrli tehnologııalyq platformalarda jáne ártúrli merdigerler arqyly bólshektep jasalǵan. Sonyń saldarynan derekterdiń qaıtalanýy, júıelerdiń úılespeýi, súıemeldeý men jańǵyrtý shyǵyndarynyń artýy jáne aqparattyq qaýipsizdik táýekelderiniń kóbeıýi baıqalady, – dedi depýtat.
Sondaı-aq ol memlekettik aqparattyq júıelerdi esepke alý, balansyna qoıý, tsıfrlyq aktıvterdi túgendeý, bastapqy kod pen tehnıkalyq qujattamany memleketke berý boıynsha biryńǵaı tásildiń áli qalyptaspaǵanyn aıtty.
Depýtattardyń málimetinshe, keı jaǵdaılarda memlekettik organdar aqparattyq júıelerdi súıemeldeý men jańǵyrtý máselesinde jekelegen jetkizýshilerge tehnologııalyq turǵydan táýeldi bolyp qalǵan.
Mysal retinde depýtat Ulttyq ekonomıka mınıstrliginiń Kásipkerlik sýbektileriniń tizilimi aqparattyq júıesin atady. Onda jetkizýshimen yntymaqtastyq toqtaǵannan keıin ákimshilendirý, qoljetimdilik, kiltter men tehnıkalyq súıemeldeý boıynsha qıyndyqtar týyndaǵan.
– Bul memleket óz aqparattyq júıelerine tolyq baqylaýdy joǵaltý qaýpi bar ekenin kórsetedi, – dedi Nursultan Baıtilesov.
Osyǵan baılanysty «AMANAT» fraktsııasy Úkimetke memlekettik aqparattyq júıelerge tolyq ınventarızatsııa júrgizýdi, olardyń naqty ıelerin, operatorlaryn, ákimshilerin anyqtaýdy jáne memlekette baǵdarlamalyq qamtamasyz etý men bastapqy kodqa quqyqtardyń bar-joǵyn tekserýdi usyndy.
Sonymen qatar depýtattar memlekettik organdardyń aqparattyq júıelerdi tehnıkalyq ákimshilendirýge tolyq baqylaý júrgize almaǵan jaǵdaılaryna tekserý júrgizip, quqyqtyq baǵa berýdi surady.
Fraktsııa sondaı-aq menshik ıesi, operator, ákimshi, merdiger, qarjylandyrý kózi jáne júıeniń mańyzdylyq deńgeıi kórsetiletin biryńǵaı memlekettik aqparattyq júıeler tizilimin qurýdy usyndy.
Buǵan deıin derbes derekterdi qorǵaý jáne kıberqaýipsizdikke qatysty jańa tetikter engiziletinin jazǵanbyz.
