Depýtattar medıtsınalyq oqý oryndarynda balalar dárigeri bóliminiń joıylýyna alańdaýshylyq bildirdi
ASTANA. QazAqparat - Depýtattar medıtsınalyq oqý oryndarynda balalar dárigeri bólimderiniń joıylýyna alańdaýshylyq bildirdi. Búgin Parlament Májilisiniń jalpy otyrysynda Densaýlyq saqtaý jáne áleýmettik damý mınıstriniń atyna saýal joldaǵan depýtat Danııa Espaeva osy máseleni kóterdi.
Onyń aıtýynsha, Densaýlyq saqtaýdy damytýdyń 2011-2015 jyldarǵa arnalǵan baǵdarlamasy aıasynda byltyrdan beri balalar emhanasy eresekter emhanasymen biriktirilgen. Osyǵan baılanysty barlyq medıtsınalyq mekemelerde jalpy tájirıbedegi dáriger balalardy da, eresekterdi de qabyldaı beredi. Al medıtsınalyq joǵary oqý oryndarynda «pedıatr» mamandyǵy joıylǵan. «Mundaı jańalyq qoǵam tarapynan oryndy synǵa ushyraýda. «Aq jol» partııasyna shaǵymdanǵandar osynyń saldarynan emhanalarda bir dárigerge qaralý úshin aıaǵy aýyr áıelder de, emshektegi balasy barlar da, qart kisiler men jas balalar da úlken kezekke turatynyn aıtady. Ondaı kezekte turǵan naýqastardyń kóńil-kúıleri aıtpasa da túsinikti», - deıdi depýtat.
Bul rette D. Espanova medıtsınalyq joǵary oqý oryndarynda pedıatrııa fakýltetteriniń jabylýy da zor alańdaýshylyq týdyratynyn alǵa tartty. Onyń aıtýyna qaraǵanda, búgingi kúni terapevt dárigerler tórt aılyq kýrstardan ótip, onyń barysynda olar balalar arasynda eń kóp taralǵan aýrý túrleri týraly ǵana bilimin jetildiredi. «Balalar aǵzasynyń ereksheligi arnaıy bilimmen qatar uqypty qarym-qatynasty da talap etetini belgili. Máseleniń moraldyq-psıhologııalyq qyrynan bólek, balalardy emdeýdegi endigi dárigerlerdiń bilikti ári tıimdi qyzmeti de kúmán týdyrady. Mundaı reforma ata-analardyń ǵana emes, dárigerlerdiń ózderi tarapynan da túsinispeýshilikke ushyraýda. Eń soraqysy, osyndaı synaqtan bizdiń balalarymyz japa shegip jatyr. Al ondaı biriktirýlerdiń tıimdiligi týraly eshqandaı qorytyndylar qoǵamǵa belgisiz», - dedi depýtat.
Bul rette D. Espanova otbasy dárigeri praktıkasyna kóshýdiń mańyzdylyǵyn túsine otyryp, atalǵan baǵdarlamada Qazaqstandaǵy balalar dárigeri boıynsha qalyptasqan kópjyldyq oń tájirıbeler eskerilmegenin alǵa tartady.
