«Depýtattar Májilisti taratý týraly úndeý jarııalady» - respýblıkalyq basylymdarǵa sholý
***
Ótken qazan aıynda Prezıdent Nursultan Nazarbaev «Bilim týraly» Qazaqstan Respýblıkasynyń zańyna ózgerister men tolyqtyrýlar engizý týraly» zańǵa qol qoıǵan bolatyn. Ýaqyt talabyna saı ázirlengen mundaı zań qabyldaý bilim berý júıesin odan ári jetildirip, oqý sapasyn arttyrýǵa azamattarymyzdyń keler kúnge degen senimin bekitip, qyzyǵýshylyǵyn jetildirip, atalǵan salanyń álemdik bilim keńistiginen óz ornyn alýyna múmkindik beredi. Bul oraıda «Egemen Qazaqstan» gazeti osyndaı aýqymdy jumystardyń jolashary bolatyn qujattyń aınadaı naqtylanǵan tustaryn bilý maqsatynda Bilim jáne ǵylym mınıstri Baqytjan Jumaǵulovty áńgimege tartqan. Suhbat «Ýaqytpen úndes qujat» degen taqyryppen berilgen.
«Egemen Qazaqstan» gazetiniń jazýynsha, keshe Parlament Senatynda palata Tóraǵasy Qaırat Mámıdiń tóraǵalyq etýimen kezekti otyrys boldy. Kún tártibine sáıkes, depýtattar birqatar halyqaralyq kelisimder men sharttardy ratıfıkatsııalaý týraly zań jobalaryn qarap, qabyldady. Olardyń qatarynda Qazaqstan men Serbııa arasyndaǵy Erkin saýda týraly úkimetaralyq, Qazaqstan men Azııa Damý banki arasyndaǵy qaryz týraly, Eýrazııalyq ekonomıkalyq qoǵamdastyqta agroónerkásiptik keshenderde paıdalanylatyn aýylsharýashylyq tehnıkasynyń, mashınalardyń, mehanızmderdiń, jabdyqtar men kólik quraldarynyń halyqaralyq lızıngin damytý týraly Májilis maquldaǵan kelisimder bar.
***
Astana saıası oqıǵalardyń ǵana emes, óner men mádenıettiń de ordasyna aınalyp úlgergenin buqara jurt aıtyp júr. Endi birer jyldan keıin elordamyz óndiris oshaqtarynyń ortalyǵyna aınalsa, tańǵalmaıtyn bolamyz. Óıtken «Astana - jańa qala» arnaıy ekonomıkalyq aýmaǵyndaǵy Indýstrıaldyq parktiń jumysy qyzatyn kún jaqyn. Máselen, aldaǵy jeltoqsanda bir ǵana Astananyń ózinde bes birdeı jobanyń tusaýy kesilmek. Bul jaıynda egjeı-tegjeıli bilgińiz kelse, «Aıqyn» gazetiniń búgingi sanyndaǵy «Qazaqstanda jasalǵan vagondar jańa jylda jolǵa shyǵady» degen taqyryptaǵy maqalaǵa kóz júgirtińiz.
«Búkil Eýrazııalyq keńistikte halyqaralyq saýda-ekonomıkalyq yntymaqtastyqty jandandyrý qajet. Qazaqstan Kóshbasshysy keshe Astanada «Qazaqstannyń kólik kúnderi» aıasynda ótken «TransEýrazııa - 2011» 8-shi halyqaralyq konferentsııanyń qatysýshylaryna joldaǵan úndeýinde osyny málimdedi», - dep jazady «Aıqyn» gazeti búgingi sanyndaǵy «Uly Jibek joly» qaıta túleıdi» degen maqalasynda. Basylymnyń atap ótýinshe, Elbasy «senimdi kólik «kúretamyrlaryn» qurýdyń» «Azııa men Eýropa memleketteriniń kóliktik saıasatynyń sheshýshi basymdyǵy» bolyp tabylatyndyǵyn nyqtaı túsken.
***
«Parlament Májilisi merziminen buryn taraıdy eken» degen gý-gý áńgime rasqa aınalǵandaı. Gazetimizdiń ótken sanynda depýtattar «Parlamentti qalaı taratsaq» dep bas qatyryp jatqanyn túrtip ótken edik. Keshe bul máseleniń sheshimi tabylǵan sekildi», - dep jazady «Alash aınasy» gazeti. Basylymnyń atap ótýinshe, keshe Parlament Májilisiniń depýtattary Nurtaı Sabılıanov pen Vıktor Rogalev Májilis pen máslıhat depýtattarynyń aldyn ala saılaýyn ótkizý týraly usynys jóninde úndeý jarııalady. Eki depýtattyń aldyn ala saılaý ótkizýge sebep bolǵan alty dáıegin bilgińiz kelse, basylymnyń búgingi sanyndaǵy «Depýtattar Májilisti taratý týraly úndeý jarııalady» degen taqyrypqa nazar salyńyz.
«Úıinen shyǵyp ketip, oralmady...». Búginde mundaı habarlandyrýlardy kez kelgen kósheden keztestirýge bolady. estı-estı qulaq sarsyp, etimiz ólip ketken. Selt etpeımiz. Іshki ister organdary osyndaı qulaqqaǵys jasaǵanymen, keıin ol aamdardyń tabylǵan-tabylmaǵanynan habardar etpeıdi de. Mine osy másele kóterilgen maqala «Alash aınasy» gazetiniń juma kúngi sanynda «Quldyń quny qansha?» degen taqyryppen berildi. «Resmı emes málimet kózderiniń derekterine súıensek, adam saýdasynyń jyldyq aınalymy 32 mıllıard dollardan asyp túsedi eken. Eńbek jáne seksýaldy quldyqtyń qurbanyna jylyna 12 mıllıonnan astam adam túsetin kórinedi», - dep jazady basylym.
