Depýtattar Mańǵystaý oblysynda mektep qurylysyna erekshe nazar aýdarý kerek ekenin aıtty

NUR-SULTAN. QazAqparat – Májilistiń jalpy otyrysynda depýtat Juldyz Súleımenova Mańǵystaý oblysyndaǵy bilim salasyndaǵy máseleni kóterip, Úkimet basshysy Álıhan Smaılovtyń atyna saýal joldady, dep habarlaıdy QazAqparat tilshisi.

«Kóterilgen máseleler jergilikti atqarýshy bılik tarapynan der kezinde sheshilmeı keledi. Halyqaralyq PISA testinen atalǵan aımaq tómen kórsetkishterge ıe. Matematıkalyq jáne ǵylymı-jaratylystaný saýattylyǵynan elimizde 15 orynda. Al qala men aýyl oqýshylarynyń oqý saýattylyǵyndaǵy alshaqtyq - 27 ball. Bul elimizdegi eń úlken alshaqtyq. Atalǵan óńirde bilikti pedagogıkalyq kadrlar tapshylyǵy 2021 jyly 1563 ustazdy qurady. Sapaly kadr máselesin sheshpeı, bilim sapasyn arttyrý múmkin emes», - dedi Juldyz Súleımenova.

Sonymen qatar ol osy óńirdegi mektepterge kúrdeli jóndeý jumystaryn júrgizý kerek ekenin atap ótti. Osy rette oblys ákimdigi barlyq aýyldyq, aýdandyq mektepterdi zamanaýı deńgeıde damytý máselesine nazar aýdarýy qajet.

«Bilim nysandarynyń qurylysy aımaqtaǵy oqýshy ornynyń tapshylyǵyn sheshpeıdi. Ótken jyly josparlanǵan Munaıly aýdanyndaǵy Basqudyq aýyldyq okrýgindegi 600 oryndyq mekteptiń qurylysy der kezinde aıaqtalmady. 2025 jyldyń 1 qańtaryna arnalǵan oqýshy oryn tapshylyǵynyń boljamdyq dınamıkalyq ósimi 60 616 oqýshy ornynyń tapshylyǵyn quraıdy. Al, Mańǵystaý oblysy 2025 jylǵa qaraı óńirde 19 660 oqýshy ornyna eseptelgen 28 mekteptiń qurylysyn josparlaǵan. Bul qalǵan 40 myń oqýshy ornynyń tapshylyǵyn sheshý úshin kem degende qosymsha 20 mektep salý qajet. Ákimdik mektep salý máselesiniń sheshimin tez arada qolǵa alýy qajet», - dedi depýtat.