Depýtattar Mańǵystaý oblysyndaǵy 150 naýqasqa arnalǵan medıtsınalyq nysandy aralady
AQTAÝ. KAZINFORM – Óńirlerge jumys sapary barysynda Májilis depýtattary, «AMANAT» partııasy fraktsııasynyń músheleri Edil Jańbyrshın men Ashat Aımaǵambetov jáne Qaraqat Ábden Mańǵystaý oblysyna bardy. Olar Memleket basshysynyń tapsyrmasy aıasynda Mańǵystaý aýylynda ashylǵan 150 oryndyq jańa aýdandyq aýrýhananyń jumysymen tanysty.
Mańǵystaý oblysyndaǵy halqy eń kóp aýdanda buryn tolyqqandy aýrýhana bolmaǵan. Maýsym aıynda ashylǵan jańa kópsalaly aýrýhana alty korpýstan turady. Onda juqpaly aýrýlar bólimi, balalar bólimshesi, terapııa, bosaný blogy, zararsyzdandyrý, dıagnostıka qyzmetteri, qabyldaý bólimi jáne birneshe operatsııalyq bólme bar. Medıtsınalyq mekeme 150 naýqasqa arnalǵan, shtatynda 260 maman jumys isteıdi.
Depýtattar bul joba halyqqa berilgen áleýmettik ýádelerdiń is júzinde oryndalǵanynyń dáleli ekenin atap ótti.
– Bul – 200 myńdaı turǵynnyń kóp jylǵy úmitin aqtaǵan mańyzdy joba. Biz osy jobany partııanyń saılaýaldy baǵdarlamasyna engizdik jáne nátıjesin kózimizben kórip otyrmyz. Zamanaýı operatsııa bólmeleri, zerthanalary, qabyldaý jáne bosaný bólimderi bar aýrýhana endi 50 shaqyrym qashyqta emes, aýdannyń ózinde tur, - dedi E.Jańbyrshın.
Kezdesýde densaýlyq saqtaý júıesin jańartý máselesi de talqylandy. Májilistegi Áleýmettik-mádenı damý komıtetiniń tóraǵasy Ashat Aımaǵambetov dárigerlerge medıtsına salasyn damytýǵa baǵyttalǵan sharalar týraly baıandady.
Aýyldy jerlerdegi dáriger tapshylyǵy – eń ózekti máselelerdiń biri. Bıyl Mańǵystaý oblysynyń aýyldaryna kóship barǵan 32 dárigerge 100 eń tómengi jalaqy mólsherinde (shamamen 9 mıllıon teńge) kóterme tólem berilgen. Jalpy el boıynsha 700-ge jýyq medıtsına qyzmetkeri aýyldarǵa jumysqa aýysqan. Bul da «AMANAT» partııasynyń saılaýaldy baǵdarlamasynda qarastyrylǵan.
Buǵan qosa Prezıdent tapsyrmasymen medıtsına qyzmetkerlerin kásibı saqtandyrý júıesi jumys isteıdi. Endi dárigerlerdiń qateligi saldarynan bolǵan shyǵyndar mamannyń jeke qarajaty emes, bıýdjet esebinen óteledi. Ashat Aımaǵambetov óz sózinde Májilis depýtattary men partııanyń osyǵan uqsas ózge de naqty jetistikterine toqtaldy.
– Biz qorǵaǵan eń mańyzdy nárse – alǵashqy medıtsınalyq kómekti bárine qoljetimdi etý. MÁMS jarnasy bolmasa da emhanaǵa barýǵa, negizgi qan taldaýlaryn tapsyrýǵa, EKG, ÝDZ ótýge, áleýmettik mańyzdy aýrýlar boıynsha (týberkýlez, AITV, onko) em alýǵa, dáriger keńesin alýǵa quqyǵy bar. Bul mine, Prezıdenttiń tapsyrmasyna saı, ony qamtamasyz etetin mańyzdy sheshim boldy. Sondaı-aq áleýmettik mańyzy bar aýrýlardy emdeýge arnalǵan dári-dármekterge qosymsha qun salyǵy salynbaıtyn boldy. Bul sheshim eń qajetti dári-dármekter baǵasynyń qymbattaýynyń aldyn alady, - dedi A.Aımaǵambetov.
Dárigerler keıingi jyldary memleket densaýlyq saqtaý salasyna erekshe kóńil bóle bastaǵanyn, partııa halyq ótinishterin qarap, naqty ózgeristerge qol jetkizgenin aıtty. Degenmen kadr tapshylyǵy, turǵyn úı, shalǵaıdaǵy aýyl turǵyndary úshin logıstıka máselesi áli de ózekti. Dárigerler bul túıtkilderdi júıeli túrde sheshý, ashyq dıalog júrgizý jáne birlesip áreket etý mańyzdy ekenine toqtaldy.
Kezdesý barysynda depýtattar aýrýhanany aralap, medıtsına qyzmetkerleriniń suraqtaryna jaýap berdi. Olardyń usynystaryn tyńdap, ózekti máselelerdi ashyq talqylady. Aıtylǵan usynystar depýtattardyń baqylaýyna alynyp, jaýapty mınıstrliktermen birlese pysyqtalady.
Aıta ketý kerek, «AMANAT» partııasynyń Mańǵystaý oblysy boıynsha saılaýaldy baǵdarlamasy aıasynda 2027 jylǵa deıin 6 densaýlyq saqtaý nysanyn salý, 10 nysandy kúrdeli jóndeýden ótkizý jáne bastapqy medıtsınalyq-sanıtarlyq uıymdardy zamanaýı quraldarmen 100 paıyz qamtamasyz etý josparlanǵan.
Eske salsaq, buǵan deıin Májilis depýtattary Qaraǵandy shahterlerimen eńbek adamdaryn qoldaý jaıyn talqylaǵan bolatyn.