Depýtattar Qyzylorda men Qostanaıdyń ýaqytyn aýystyrýdy surady
ASTANA. QazAqparat - Búgin Parlament Májilisiniń jalpy otyrysynda depýtat Balaıym Kesebaeva Qyzylorda men Qostanaı oblystarynda ýaqytty ózgertý máselesin kóterdi. Sebebi qazirgi ýaqyttyń tártibi xalyqtyń densaýlyǵyna keri áserin tıgizip otyr.
Osyǵan oraı, bir top depýtattar QR Premer-Mınıstri Baqytjan Saǵyntaevtyń atyna saýal joldady, dep xabarlaıdy QazAqparat tilshisi.
Onyń aıtýynsha, óńirlerdi aralaý kezinde Qyzylorda oblysynyń turǵyndary jergilikti ýaqytty esepteý tártibin ózgertý máselesin taǵy kóterdi. "Bul máseleni oblys xalqy 2005 jyldan bastap, ıaǵnı Qyzylorda men Qostanaı oblystarynyń ýaqyt ólshemin daǵdyly ýaqytynan alǵa jyljytý týraly sheshim qabyldanǵannan beri kóterip keledi. Májilis jáne Senat depýtattary buǵan deıin atalǵan máseleni Úkimet aldyna depýtattyq saýal retinde birneshe ret qoıǵan bolatyn. Úkimetten tıisti zertteý jumystary júrgiziledi degen jaýap alyndy. Biraq áli kúnge deıin naqty sheshim qabyldanǵan joq", - dedi B.Kesebaeva.
Onyń sózine qaraǵanda, Fesenkov atyndaǵy astrofızıkalyq ınstıtýtynyń aqparaty boıynsha Qyzylorda oblysynyń terrıtorııasy tórtinshi saǵattyq beldeýge jatady jáne qazirgi dekrettik ýaqyttan 2 saǵat 30 mınýtqa alda keledi. "Al ǵalymdardyń zertteýine sáıkes, ýaqyt beldeýinen bir saǵat alda júrý adam organızmindegi bıologııalyq rıtmniń ózgerýine ákelip soqtyrady. Mundaı ózgeristiń nátıjesi depressııaǵa, psıxologııalyq aýrýlarǵa, sýıtsıdtik minez-qulyqqa, sondaı-aq desınxronozǵa, júıke júıesi men onkoologııalyq aýrýlarǵa sebep bolyp jatady. Ásirese, egde jastaǵy jáne balalarǵa teris yqpal tıgizýde. Mektepke deıingi jáne mektep jasyndaǵy balalar tabıǵı ýaqyttan erte uıqylarynan turyp, táýliktiń qarańǵy ýaqytynda oqý mekemesine barýǵa májbúr. Bul densaýlyqpen qatar sabaq úlgerimine de teris áser etýde. Uqsas másele Qostanaı oblysynda da bar eken. Bul óńirde de adamdardyń densaýlyqqa zııan tıgizetin bıorıtmmen kúresip otyrǵanyna nazar aýdarý qajet", - dedi B.Kesebaeva.
Depýtattyń aıtýynsha, atalǵan máseleni sheshý úshin qarjy qajet emes. Degenmen, Qyzylorda men Qostanaıdyń ýaqytyn retke keltirý problemasy sozbalańǵa salynyp otyr.
