Depýtattar Qylmystyq-atqarý zańnamasyn jetildirý máselelerin talqylamaq
ASTANA. QazAqparat - Májilis Spıkeri Qabıbolla Jaqypovtyń tóraǵalyǵymen Palata bıýrosy ótti. Onda depýtattardyń aldaǵy jalpy otyrysynda qaralatyn máseleler naqtylandy.
Depýtattardyń talqylaýyna Qylmystyq-atqarý kodeksi ekinshi oqylymǵa shyǵarylady, dep habarlaıdy QR Parlamenti Májilisi Apparatynyń baspasóz qyzmetinen.
Qujat jaıynda baıandaı kele, salalyq komıtet zań jobasy sottalǵandardyń quqyqtary men zańdy múddeleriniń qorǵalý deńgeıin, qylmystyq jazalardy oryndaýdyń tıimdiligin, olarǵa tárbıelik turǵydan yqpal etýdiń sapasy men dárejesin jaqsartý jáne qajetti áleýmettik, quqyqtyq jáne psıhologııalyq kómek kórsetý maqsatynda qylmystyq-atqarý zańnamasyn odan ári jetildirýge baǵyttalǵanyn málimdedi.
Jalpy otyrysta «Innovatsııalyq tehnologııalar parki» ınnovatsııalyq klasteri týraly zań jobasy ilespe túzetýlerimen ekinshi oqylymda qaralady.
Palatanyń kún tártibine Qazaqstan-Reseı aralyq áýe shabýylyna qarsy qorǵanysynyń biryńǵaı óńirlik júıesin qurý týraly Kelisimdi ratıfıkatsııalaıtyn zań jobasy da engizildi.
Sondaı-aq depýtattar maqta salasyn damytý máseleleri, poshta baılanysy salasyndaǵy zańnama normalaryn Dúnıejúzilik poshta odaǵy aktileriniń normalarymen birizdendirý jáne poshta operatorlarynyń qyzmetin retteý máseleleri boıynsha túzetýler jáne «Qylmystyq áreketten túsken tabystardy jylystatý, anyqtaý, alyp qoıý jáne tárkileý týraly konventsııany ratıfıkatsııalaý týraly» zań jobasy boıynsha qorytyndy ázirleý merzimin naqtylaıtyn bolady.
Aıta keteıik, alda bolatyn jalpy otyrystyń kún tártibinde depýtattardyń aımaqtarǵa shyǵyp, saılaýshylarmen kezdesýi jaıly másele de qaralmaq.
