Depýtattar qutqarýshylardyń zeınet jasyn tómendetýdi usyndy
NUR-SULTAN. QazAqparat – QR Parlamenti Májilisindegi «Halyq kommýnısteri» fraktsııasy Premer-Mınıstr Asqar Mamınge qutqarýshylardyń jaǵdaıyn jaqsartý týraly depýtattyq saýal joldady, dep habarlaıdy QazAqparat tilshisi.
Fraktsııa Memleket basshysy Qasym-Jomart Toqaevtyń Joldaýda azamattyq qorǵanys qyzmetine mán berip, ondaǵy qyzmetkerlerdiń jalaqysyn kóterýdi tapsyrǵanyn eske saldy jáne birqatar usynym jasady.
«Belarýs Respýblıkasynyń mysalymen memlekettik órtke qarsy qyzmettiń qatardaǵy qyzmetkerlerine qosymsha jumys isteýine zańdyq quqyq berý kerek. Qazirgi ýaqytta Qazaqstanda buǵan tyıym salynǵan. Memlekettik órtke qarsy qyzmetke qabyldaý merzimin alty aıdan úsh aptaǵa deıin qysqartqan jón. Sonymen birge, kóppáterli turǵyn úı, ónerkásiptik jáne áleýmettik nysandar qurylysynda jobalyq-smetalyq qujattama jasaýǵa órtke qarsy qyzmet mamandaryń qatysýyn mindetteý kerek», - dedi «Halyq kommýnısteri» fraktsııasynyń múshesi Magerram Magerramov Májilistiń jalpy otyrysynda.
Sonymen birge, depýtat órtke qarsy qyzmet ǵımarattary men avtoparkin, qural-jabdyqtaryn kezeń-kezeńimen jańartýdy jáne qutqarýshylardyń zeınet jasyn tómendetýdi usyndy.
«Qutqarý qyzmetiniń zeınetke shyǵý jasyn polıtsııa men memlekettik qyzmetshiler jasyna sáıkes tómendetý kerek. Búginde qutqarýshylar 63 jasqa deıin jumys isteýge mindetti. 60 jastaǵy sý qutqarýshysyn kózge elestetý qıyn. Depýtattyq saýalǵa zańmen belgilengen merzimde jaýap joldaýyńyzdy suraımyz», - dedi depýtat.
