Depýtattar Qostanaıdaǵy «Aqyldy et fermasy» jobasymen tanysty
QOSTANAI. QazAqparat - QR Parlamenti Májilisiniń depýtattary: Arman Qojahmetov, Snejanna Imasheva, Olga Shıshıgına, Quralaı Qareken Qarabalyq aýdanyna jumys saparymen bardy, dep habarlaıdy QazAqparat «Nur Otan» partııasy oblystyq fılıalynyń baspasóz qyzmetine silteme jasap.
Halyq qalaýlylary elimiz boıynsha eń iri mal bordaqylaý alańy bar «Astyq ındýstrııasy» agroholdınginiń tynys-tirshiligimen tanysty.
Aıta ketý kerek, búginde bul iri seriktestikke birneshe kásip nysany kiredi. Sonyn biri - «Terra» JShS mal bordaqylaý alańy. 2011 jyly alǵash ret Aýstralııa eliniń «Aberdın angýs» tuqymyn ákelip, iri qara basyn kóbeıtýdi maqsat etken edi. Keıingi jyldary, irgeli sharýashylyq mal basyn 8 myń basqa deıin jetkizip, ótken jyly 20 myń mal basy kórsetkishin baǵyndyrdy. «Astyq ındýstrııasy» holdınginiń basshylyǵy májilis depýtattaryna júzege asqan jobalar men baǵyndyrǵan jetistikter jaıly baıan etti. Ásirese, sońǵy jyldary sátti bastamalardyń biri asyl tuqymdy mal basyn kóbeıtý isi órge domalap keledi.
«Et klasteriniń negizgi maqsaty - sıyr etiniń kólemin odan ári arttyrý. Máselen, 2018 jyly 101 myń mal basyna shaqtalǵan mal bordaqylaý alańyn turǵyzdyq. Bul degenimiz 2,5 myń tonna sıyr eti bolsa, onyń jartysynan kóbi Reseı jáne Ózbekstanǵa eksporttaldy», - deıdi «Astyq ındýstrııasy» agroholdınginiń bas dırektory Dáýlet Ahmetqalıev.
Onyń sózinshe, aldaǵy ýaqytta kompanııa 5 myń tonna et óndirip, 2 myń tonnasyn syrtqa jóneltýdi mejelep otyr. Sharýashylyqta tsıfrly tehnologııalar da keńinen qoldanylýda. «Aqyldy et fermasy» óz tıimdiligin kórsetip, shyǵyndy azaıtýǵa múmkindik berdi. Іri qaraǵa arnalǵan arnaıy azyq berý júıesi de qurastyrylǵan.
- Et - eksportqa shyǵarýda paıda ákeletin ónim. Búginde Qazaqstan 900 myń tonnadan astam et óndiredi, osy baǵyt boıynsha úlken eksporttyq áleýetke ıe. Al mal sharýashylyǵy ónimderin ótkizýde kedergi joq. Eldiń agroónerkásiptik kesheni úlken áleýetke ıe bolǵandyqtan, onyń syrtqy naryqtaǵy damý keleshegi zor. 2017-2027 jyldarǵa arnalǵan Ulttyq baǵdarlamada asyltuqymdy mal basyn kóbeıtýge de erekshe den qoıylyp otyr. Bir ǵana jergilikti holdıng ózge iri sharýashylyqtarǵa úlgi bola alatynyn kórsetedi», - dedi QR Parlamenti Májilisiniń depýtaty Arman Qojahmetov.
Holdıngke qarasty «Terra» sharýashylyǵynda 40-tan astam qyzmetker bar. Olardyń jalaqysy 100 myń teńgeden asady. Memlekettik baǵdarlamalar aıasynda sýbsıdııalar da qarastyrylǵan. Bolashaqta, et óndirý isin dóńgeletip, halyqaralyq deńgeıge shyǵý jospary bar ekendigin aıtady, holdıng basshylyǵy. Al, halyq qalaýlylary mal sharýashylyǵy salasyndaǵy keń kólemdi jobalarǵa oń baǵalaryn berdi.Aldaǵy ýaqytta, et óndirisi alǵa basyp, ekonomıkanyń negizgi tiregine aınalatyndyǵyna senim bildirdi.
