Depýtattar kómekke shyn muqtaj stýdentterge qol ushyn sozý qajettigin aıtty - Astana
ASTANA. QazAqparat - Astana qalasy máslıhatynyń depýtattary JOO aralady, dep habarlaıdy astana.gov.kz.
«Jastarǵa memlekettik qoldaý kórsetýdi qamtamasyz etýdiń jáne olardy elordanyń qoǵamdyq ómirine qatystyrýdyń jaı-kúıi men sharalary týraly» másele qalalyq maslıhattyń aldaǵy sessııasynyń talqylaýyna shyǵaryldy. Halyq qalaýlylary stýdent jastarynyń oqý sharttarymen jáne mekendeý jaǵdaıymen tanysý úshin elordanyń joǵarǵy oqý oryndaryna barýǵa sheshim qabyldady», - delingen Astana qalasy máslıhatynyń saıtynda jarııalanǵan aqparatta. S.Seıfýllın atyndaǵy Qazaq agrotehnıkalyq ýnıversıteti - birinshi keler obektisi boldy. «S.Seıfýllın atyndaǵy Qazaq agrotehnıkalyq ýnıversıtet» AQ tóraǵasy, qalalyq máslıhat depýtaty Aqylbek Kúrishbaev joǵarǵy oqý orny stýdentterimen kezdesýdi asha otyryp, qazirgi zamanǵy ýnıversıtettiń jaǵdaıyn, mamandardy daıyndaý deńgeıin, materıaldyq-tehnıkalyq bazasyn, joǵarǵy oqý ornynyń áleýmettik saıasatyn aıtyp berdi. Sodan keıin halyq qalaýlylary memleket saıasatyna, elimizde shaǵyn jáne orta bıznestiń damýyna, ásirese depýtattardyń qyzmetine qatysty stýdentterdiń suraqtaryna jaýap berdi. Qalalyq máslıhat hatshysy Sansyzbaı Esilov óz sózinde stýdentterdiń nazaryn eń mańyzdy qundylyq jáne adamnyń rýhanı damýynyń ajyramas bóligi retinde patrıotızm máselelerine aýdardy. Ol patrıotızm qoǵamǵa, týǵan qalasyna, memleketine paıdaly bolýy nıetine negizdeletinin atap ótti. Qoǵamdyq kólik nemese stýdentterge arnalǵan bıletter boıynsha tegin júrý múmkindigi týraly úshinshi kýrs stýdenti Abaı Imanovtyń suraǵyna Sansyzbaı Seıitjanuly máseleniń erekshe baqylaýǵa alynǵanyn aıtty. Depýtattar osyndaı kómekke shyn muqtaj stýdentterge qol ushyn sozý úshin ataýly kómek kórsetýdi josparlap otyr. Depýtattar Bıotehnologııa ǵylymı-zertteý ınstıtýtynyń negizgi qyzmetiniń baǵyttarymen jáne jańa suryptar men aýyl sharýashylyǵy ósimdikteriniń býdandaryn alýǵa baǵyttalǵan kletkalyq ınjenerııa salasyndaǵy uzaq merzimdi josparlarmen, molekýlalyq bıologııamen jáne nanotehnologııamen tanysty. Depýtattar tehnıkalyq fakýltettiń ashanasynda, jańa ǵımaratta, emhanada bolyp, stýdentterdiń oqý jáne turmys jaǵdaılaryn kórip, JOO-nyń tehnıkalyq jabdyqtalýyna, stýdentterdi áleýmettik qoldaýǵa baǵyttalǵan saıasatyna qanaǵattanarlyq baǵa berdi. JOO aralaýǵa qalalyq basqarmalardyń basshylary, «Jas Otan» jastar qanaty, «ZhasStar jastar saıasaty ortalyǵy», buqaralyq aqparat quraldarynyń ókilderi qatysty.
