Depýtattar qoqys óńdeý naryǵyna Qytaı ınvestorlary zańsyz jolmen kirmekshi dep alańdap otyr
ASTANA. KAZINFORM – Májilis depýtaty Erlan Barlybaev Májiliste ótip jatqan dóńgelek ústelde Qytaı ınvestorlary men birneshe qala ákimdigi tikeleı kelisimshart jasaý arqyly Ekologııa kodeksiniń talaptaryn buzýy múmkin ekenin málim etti.
- Qaldyqtardy qaıta óńdeýdiń energetıkalyq tarıfin qashan bekitesizder? Shekti tarıf qansha bolady? Aýktsıon qashan jarııalaısyzdar? Jýyqta ǵana Almaty jáne basqa qalalarda ondaı zaýyttardy Qytaı tarabymen tikeleı kelisimshart arqyly salýdy josparlap otyrǵandaryńyz týraly BAQ-ta aqparat shyqty. Bul birinshi kezekte Ekologııa kodeksin buzyp tur ǵoı? Eger Úkimettiń ózi oryndamaıtyn bolsa, biz myna jaqta zańdardy ne úshin jazyp jatyrmyz? Bul jerde sybaılas jemqorlyq quramy bar dep oılamaısyz ba, - dep surady depýtat.
Ekologııa jáne tabıǵı resýrstar mınıstriniń orynbasary Jomart Álıev ázirge eshbir ınvestormen tikeleı kelisimshart jasalmaǵanymen, keleshekte sondaı bastamalar iske asýy múmkin ekenin joqqa shyǵarmady.
- Qaldyqtardy órteý arqyly kádege jaratýdyń shekti energetıkalyq tarıfi 1 kVt/saǵatqa 130,3 teńge bolyp bekitilgen. Búgingi tańda aýktsıondar ótkizýdiń qoldanystaǵy tártibinde qoqysty órteý arqyly energııa alý baǵyty boıynsha mehanızm joq. Aýktsıondy bastaýǵa zań turǵysynan eshqandaı kedergi joq. Almaty jáne birqatar iri qalada Qytaı ınvestorlarynan qoqys órteıtin zaýyt salý boıynsha usynystar túskenin durys aıtyp otyrsyz. Bul Úkimet deńgeıinde qaralyp jatqan másele. Búgingi tańda qandaıda bir ınvestormen eshbir tikeleı kelisimshart jasalǵan joq. Biraq Úkimet osyndaı norma engizýdi qarastyryp jatyr, - dedi ol.
Depýtattar munyń Ekologııa kodeksiniń talaptaryna qaıshy ekenin qaıta eske saldy.
- Nege ondaı normaǵa baryp jatyrmyz? Shynymen de bizde ınvestor aýktsıon konkýrsy arqyly anyqtalý kerek. Biraq qazaq Qazaqstanda ondaı jumys júrgizý tájirıbesi joq. Qoqysty zaýytta órteý tájirıbesi joq. Ekologııa jáne tabıǵı resýrstar mınıstrliginde bul máselelerdi tolyq baǵalaýǵa bilim-biligi jetetin maman joq, - dedi vıtse mınıstr.
Bul jaýapqa kóńilderi kónshimegen depýtattar Úkimetke resmı saýal joldaıtyn bolyp ýaǵdalasty.
Eske salsaq, jýyqta ǵana Jetisý oblysynda prokýrorlar zańsyz qoqys óńdeıtin zaýyt salmaq bolǵan kásipkerden 2 gektar jerdi memleketke qaıtarǵan bolatyn.