Depýtattar kodeks jobasynan adamdardyń erkin qozǵalysyn shekteıtin normany alyp tastaýdy usynady
ASTANA. QazAqparat - Májilis depýtattary Ákimshilik quqyq buzýshylyq kodeksinen adamdardyń erkin qozǵalysyn shekteıtin aldyn alý ınstıtýtyn alyp tastaýdy usynady. Bul týraly Parlament Májilisi Zańnama jáne sot-quqyqtyq reformalar komıtetiniń keńeıtilgen otyrysynda málim boldy. Eske salaıyq, komıtet otyrysynda jańa redaktsııadaǵy Ákimshilik quqyq buzýshylyq týraly kodeks jobasy ekinshi oqylymda talqylanǵan bolatyn.
«Ekinshi oqylymǵa talqylaý barysynda depýtattar kodeks jobasyn jaqsartatyn birqatar usynystar jasady. Belsendi talqylaýda jobany ázirleýshi tarap depýtattardyń usynystaryna qoldaý bildirdi. Atap aıtqanda, depýtattar Qylmystyq Kodeksten 10 qylmys quramyn Ákimshilik kodeks jobasyna qaıtardy», - dedi zań jobasy boıynsha jumys tobynyń jetekshisi depýtat Arman Qojahmetov.
Toqtala ketetin jaıt, kodeksti ázirleýshiler 58 qylmys quramyn Qylmystyq Kodekske aýystyrǵan bolatyn. Depýtattardyń usynysymen osynyń 10 quramy Ákimshilik kodekske qaıtarylyp otyr. Olardyń qatarynda turmystyq-otbasylyq quqyq buzýshylyqtar, jeńil qylmystar, qoǵamdyq birlestikter týraly zańnamany buzý, beıbit mıtıngter ótkizý tártibin buzý sekildi qylmystar qarastyrylyp otyr.
«Budan bólek, zańdy jáne jeke tulǵalardyń qyzmetin toqtatý men tyıym salý tártibi de qaıta qaraldy. Bul tereń ári jan-jaqty talqylanǵan másele. Sonymen qatar, depýtattardyń usynysymen adamdardyń erkin qozǵalysyn shekteıtin aldyn alý ınstıtýty da jobadan alynyp tastaldy. Bul norma qoldanystaǵy Kodekske 2010 jyldyń sáýirinde engizilgen bolatyn. Ol negizinen jeke basyn kýálandyratyn qujaty joq adamdardyń jáne turǵylyqty mekenjaıy joq tuǵalardyń bostandyǵyn shekteýdiń aldyn alý quqyǵy retinde qarastyrylǵan edi. Sonymen qatar, bul shara sýbektiniń tulǵasyn anyqtaý, sondaı-aq tulǵanyń qandaı da bolmasyn quqyq buzýshylyq jasaǵanyn aıqyndap, oǵan jedel shara qabyldaýǵa baǵyttalǵan edi», - dedi A.Qojahmetov.
Jalpy, jańa redaktsııadaǵy kodeks jobasy 900 baptan turady. Qujat negizinen ákimshilik zańnamany eleýli túrde reformalaýǵa, memlekettik organdardyń ákimshilik jazalardy qoldaný jónindegi ókilettikterin aıqyndaýǵa baǵyttalady. Budan bólek, joba aıasynda ákimshilik zańnama izgilendirilip, sottarǵa túsetin júkteme azaıtylady. Osyǵan baılanysty sottar men ákimshilik quqyq buzýshylyq týraly isterdi qaraıtyn ýákiletti organdardyń quzyretteri qaıta qaralady.
