Depýtattar Kırmen shaıqasqan batyr babalar erligine monýment qoıýdy usyndy

NUR-SULTAN. QazAqparat – Uly Dala jerinde Kırmen shaıqasqan batyr babalardyń ǵajaıyp erligine arnalǵan monýment qoıý kerek. Bul bastamany Májiliske Qazaqstan halqy Assambleıasynan saılanǵan depýtattar kóterdi, dep habarlaıdy QazAqparat tilshisi.

Atalǵan bastamaǵa baılanysty QR Úkimet basshysy Asqar Mamınniń atyna depýtattyq saýal joldandy.

«Eger Kır massagettermen shaıqasta ajal qushpaǵanda, álemniń sol zamandaǵy saıası kartasy basqasha qalyptasýy, kóptegen halyqtyń qanquıly qolbasshynyń quldyǵyna túsýi ábden múmkin edi. Eldiń azattyq jolyndaǵy osy uly erlik tól tarıhymyzda tııanaqty tańbalanyp, mektep oqýlyqtaryna keńinen engizilýge, maman zertteýshilerdiń eńbekteri arqyly álem tilderinde nasıhattalýǵa tıis», - dedi Saýytbek Ábdirahmanov.

Osy oraıda depýtat Uly Dalada osy orasan oqıǵaǵa arnalǵan monýment turǵyzý týraly usynysyn aıtty.

«2020 jyly bizdiń dáýirimizge deıingi 530 jyly ótken ol shaıqasqa 2550 jyl tolǵaly tur. Uly qolbasshy Kırdi jer qaptyrǵan shaıqastyń ótken óńirin shamamen bolsa da anyqtaýdy maqsat etetin tıisti ǵylymı-zertteý jumystaryn júrgizý jóninde naqty tapsyrma berýińizdi suraımyz. Maman tarıhshylarymyz bir toqtamǵa kelgen jaǵdaıda, ol mańaıdaǵy magıstraldyq joldyń boıynda osy jerdi mekendegen batyr babalardyń ǵajaıyp erligine arnalǵan monýment qoıý máselesin bıýdjet qarajatynyń aralasýynsyz-aq sheshýge bolady dep oılaımyz», - dedi S. Ábdrahmanov.

Esterińizge sala ketsek, «Tomırıs» fılmi bıyl kúzde jalpyulttyq prokatqa shyǵyp, úzdikter qatarynan kóringen.