Depýtattar keıbir teleónimder kópshiliktiń ashý-yzasyn týdyratynyn aıtty

NUR-SULTAN. QazAqparat - Búgin Parlament Májilisiniń jalpy otyrysynda depýtattar elimizdegi telearnalarda ulttyq qundylyqtardy nasıhattaýǵa arnalǵan baǵdarlamalardy kóbeıtýdi surady. Osy oraıda olar QR Aqparat jáne qoǵamdyq damý mınıstri Dáýren Abaevtyń atyna depýtattyq saýal joldandy, dep habarlaıdy QazAqparat tilshisi.

«Elimizdiń Tuńǵysh Prezıdenti - Elbasy usynǵan «Rýhanı jańǵyrý» baǵdarlamasyn iske asyrýdy aqparattyq qamtamasyz etý baǵytynda atqarylyp jatqan jumystar az emes. Alaıda, aıryqsha nazar aýdarýdy qajet etetin ózekti máseleler de bar. Keıbir telearnalarda ulttyq qundylyqtarymyzdy nasıhattamaq túgil, olardy óreskel burmalaıtyn, tipti neshetúrli azǵyndyqty ashyq dáripteıtin teleónimderdi kórsetý tyıylmaı tur. Buǵan Parlament Májilisine kelip túsip jatqan hattar, respýblıkalyq gazetterde jáne áleýmettik jelilerde jazylyp júrgen synı pikirler aıǵaq», - dedi depýtat Káribaı Musyrman.

Osy oraıda, ol keıbir telearna qyzmetkerleriniń «atyn shyǵarý úshin jer órteýge deıin baratyn» teris pıǵyly jurtshylyqtyń oryndy ashý-yzasyn týǵyzǵanyn atap ótti.

Bul rette depýtat tıisti usynystardy qarastyrýdy surady.

«Elbasy usynǵan «Rýhanı jańǵyrý» baǵdarlamasyn aqparattyq qamtamasyz etýdiń ózekti máselelerin respýblıkalyq jáne óńirlik buqaralyq aqparat quraldary basshylarynyń jáne qyzmetkerleriniń qatysýymen keńinen talqylaýdy uıymdastyrǵan jón. Sonyń ishinde buqaralyq aqparat quraldarynda ulttyq qundylyqtardy, salt-dástúrlerdi, qazaqstandyq qoǵamda qalyptasqan adamgershilik prıntsıpterin qatań qadaǵalaýdy usyný kerek. Qajettigine qaraı, qoldanystaǵy zańnamaǵa tıisti ózgerister engizý máselesi qarastyrylsyn», - dedi K. Musyrman.

Onyń paıymynsha, memlekettik aqparattyq tapsyrma aıasynda «Qazaqstan» jáne «Habar» memlekettik telearnalarynda Elbasy usynǵan «Týǵan jer» jáne «Aýyl - el besigi» jobalaryn keńinen nasıhattaýǵa arnalǵan taqyryptyq baǵdarlamalar ashý máselesin qarastyrǵan jón.