Depýtattar kedendik protsedýralar merzimin eselep qysqartýdy usyndy

NUR-SULTAN. QazAqparat - QR Parlamenti Májilisiniń depýtattary Keden kodeksine ózgertýler engizýge bastamashalyq jasady. Tıisti qujatty búgin Zań jobalaý qyzmeti máseleleri jónindegi vedomstvoaralyq komıssııa otyrysynda Májilis depýtaty Albert Raý usyndy, dep habarlaıdy QazAqparat tilshisi.

«Elimiz «Tsıfrlyq Qazaqstan« baǵdarlamasy boıynsha óte jaqsy ilgerilep kele jatyr. Bul kedendik protsedýralardy jeńildetý, ýaqytty, bıznestiń keden organdarymen baılanysý sanyn qysqartý úshin qosymsha múmkindikter beredi. Zań jobasy óte qarapaıym. Onda túrli operatsııalarǵa ketken 30 kúndik ýaqytty - 15, 10 kúndi 5 kúnge deıin qysqartamyz. Bul qoldanystaǵy ІT-platformalardyń arqasynda múmkin bolyp otyr», - dedi depýtat.

Albert Raý qazirgi ýaqytta bıznes tarapynan aqparattyq júıedegi irkilisterge baılanysty, shaǵymdar bar ekenin aıtty. Máselen, Qorǵasta jaryq óship qalsa, qatelikterdiń oryn alatyndyǵyna nazar aýdartty.

«Bızneske óziniń kinásiz ekendigin dáleldeýge týra keledi. Sondyqtan biz eger elektrondy júıedegi qandaı da bir qatelik oryn alsa, onda bıznesti jaýapkershilikten bosatý bóligine túzetýler engizemiz», - dedi ol.

Sonymen qatar Májilis depýtatynyń aıtýynsha, zań jobasy aıasynda kedensiz dúkender, keden qoımalary jáne olardyń qyzmetiniń toqtatylýy ári qaıta iske qosylýy elektrondy formatqa aýystyrylady.

Aıta keterligi, qazirdiń ózinde keden salasyndaǵy qyzmetterdiń 70 paıyzy elektrondy formatta kórsetiledi. Al atalǵan zań jobasynyń qabyldanýy syrtqy ekonomıkalyq qyzmettiń syrtqy qatysýshylary úshin júrgiziletin operatsııalardy elektrondy formatqa aýystyrýǵa múmkindik beredi.

Foto: atameken.kz