Depýtattar «Qazaq anımatsııasyn» «Qazaqfılmnen» bólip tastamaq
ASTANA. KAZINFORM – «Qazaq anımatsııa» shyǵarmashylyq birlestiginiń aınalasyndaǵy daý búgin Májilıste da aıtyldy. Kreatıvti ındýstrıı damytýǵa arnalǵan zań jobasyn talqylaǵan top atalmysh shyǵarmashylyq ujymdy «Qazaqfılmen» bólek shyǵarý máselesin de talqyǵa saldy.
Prodıýser Almas Jalı «Qazaq anımatsııasy» birlestigin táýelsiz uıym etýdi usyndy. Mádenıet jáne aqparat mınıstrliginiń atynan kelgen mamandar bul usynysqa naqty jaýap bere almady. Májilistiń Áleýmettik-mádenı damý komıtetiniń tóraǵasy Ashat Aımaǵambetov vedomstvo ókilderiniń bul talqylaýǵa naqty ustanymsyz kelgenine ókinish bildirdi.
Otyrystan keıin kreatıvti ındýstrııany damytýdy kózdeıtin zań jobasyn ázirleýshi jumys tobynyń jetekshisi Nartaı Sársenǵalıev osy másele týraly pikir bildirdi.
«Anımatsııa ókilderi «Qazaq anımatsııa» shyǵarmashylyq birlestigin «Qazaqfılmnen» bólek shyǵaryńyzdar dep otyr. Shynyn aıtsaq, biz anımatsııamyzdyń deńgeıi kenje qalǵanyn bilemiz. Sala mamanynyń ózi tipti «Bolashaqpen» oqyp kelgen mamandardy qosymsha oqytý kerek degendi aıtty. Sonda bizde laıyqty mamandardy shetelge jiberý úshin irikteýde problema bar degen sóz», - deıdi depýtat.
Sondaı-aq ol «Qazaq anımatsııasy» birlestigi Qazaqfılmniń» quramynda bolǵan jyldary aıtarlyqtaı nátıje kórsetpegenin aıtady.
«Osy ýaqyttyń ishinde nátıje bermegenin kórip otyrmyz. Demek ony bólek shyǵarý kerek. Men bul usynysty durys dep esepteımin. Sonda olar memlekettiń moınyna salmaq sala bermeı, ózderi de qarajat tabýǵa árekettener edi. Mamandar aıtty, Reseı men Ýkraınadan qanshama anımatorlar kelip jatyr?! 3D anımatsııa jasaıtyn mamandar sonyń kóbi. Olar bizdiń bıýdjettiń aýqymdy bóligin áketip jatyr. Sondyqtan biz básekege qabiletti mamandardy daıyndaýymyz kerek. Mınıstrlik arnaıy qor quryp, sonyń ishine kirgizsek degendi aıtty. Biz ondaı qordy qoldamaımyz. Óıtkeni Almas Jalı degen kreatordyń ózi aıtyp otyrǵany durys. Astana hub sııaqty daıyn platforma turǵanda nege jańa qor quryp, «Operator ROP» sııaqty tıimsiz mekeme ashqannyń ne qajeti bar? Qazaq anımatsııasyn qor arqyly damytamyz deý qashpaǵan sıyrdyń ýyzynan dámetkenmen birdeı. Ómirbaqı bir kompanııanyń quramynda boldy, nátıje bolmady. Múmkin jeke jiberip kórermiz? Zań jobasyn keshe ǵana aldyq. Sol kezde osy usynysty engizemiz», - deıdi Nartaı Sársenǵalıev.
