Depýtattar qaza tapqan áskerı qyzmetshilerdiń otbasyna 146 mln teńge aýdardy
ASTANA. KAZINFORM — Quryltaı depýtattary qaza tapqan jáne zardap shekken áskerı qyzmetshilerdiń otbasylaryna 146 mln teńgeden astam qarajat aýdarady.
Quryltaı Bıýrosynyń otyrysy Mańǵystaý oblysyndaǵy áskerı oqý-jattyǵý kezinde qaza tapqan áskerı qyzmetshilerdi eske alý úshin bir mınýt únsizdikpen bastaldy. Quryltaı tóraǵasy Aıbek Dádebaı qaza tapqandardyń otbasylary men jaqyndaryna kóńil aıtty.
– Mańǵystaý oblysynda qyzmettik mindetterin atqarý kezinde áskerı qyzmetshilerdiń qaza bolýy – búkil halqymyz úshin úlken qaıǵy. Osyǵan baılanysty Memleket basshysy 25 qyrkúıekti jalpyulttyq aza tutý kúni dep jarııalady. Barlyq depýtattardyń atynan qaza tapqan azamattardyń otbasylaryna kóńil aıtamyn. Bul bárimiz úshin orny tolmas qasiret, – dedi Aıbek Dádebaı.
Quryltaı tóraǵasy men depýtattary qaza tapqan jáne zardap shekken áskerı qyzmetshilerdiń otbasylaryna kómek kórsetý úshin erikti túrde qarajat jınaýdy qoldady. Qazirgi ýaqytta jeke qarajat esebinen 146 mln 650 myń teńge jınaldy. Qarajat «Ulttyq rýh» qoryna aýdarylady. Qarajat jınaý jalǵasyp jatyr. Depýtattar Aıdarbek Qojanazarov, Rýslan Idrısov, Meıirhat Qasymbaev, Bekjan Aıtqulov, Mahambet Hasenov árqaısysy 20 mln teńgeden, Dana Medeýova, Aıjan Naımbekova jáne Baýyrjan Jamalov árqaısysy 10 mln teńgeden, Turarbek Tilemisov, Muratbek Muhambedıev, Musa Haırýllıev árqaısysy 5 mln teńgeden, Begaly Eralıev 500 myń teńge jáne basqalary qarajat bóldi.
Aıta ketelik «Ádilet» partııasy qaza tapqan áskerı qyzmetshilerdiń otbasylaryna 1,5 mlrd teńge aýdaratyny týraly jazǵan edik.
