Depýtattar Kaspııde júrgiziletin ekologııalyq monıtorıngke alańdaýly
ASTANA. 8 maýsym. QazAqparat /Qanat Mámetqazyuly/ - Depýtattar Kaspııde júrgiziletin ekologııalyq monıtorıngke alańdaýly. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Erlan Nyǵmatýlın osylaı málim etti. Atalǵan saýalǵa 10 depýtat qol qoıǵan.
Depýtattyń aıtýynsha, saýal jasaýǵa Kaspııde júrgiziletin ekologııalyq monıtorıngke qatysty qalyptasqan ahýal negiz bolǵan. «Qazirgi ýaqytta Kaspıı teńizi túrli memleketterdiń, vedomstvolardyń jáne ónerkásip salalarynyń múddeleri toǵysqan oryn bolyp tabylady. Munaı operatsııalarynyń qarqyndy júrgizilýi jáne memlekettik monıtorıng qyzmetiniń materıaldyq-tehnıkalyq turǵydan jetkilikti deńgeıde jaraqtandyrylmaýy ekologııalyq monıtorıng boıynsha jumystar júrgizetin kóptegen jeke kompanııalardyń paıda bolýyna alyp keldi. Mysaly, 2007-2009 jyldary Mańǵystaý oblysynyń akvatorııasynda bir mezgilde munaı kompanııalary úshin jumystar júrgizetin jeke kompanııa memlekettik ekologııalyq teńiz monıtorıngin júzege asyrdy. Bul rette kompanııanyń korporatıvtik múddesi memlekettik múddeden joǵary qoıylatynyn joqqa shyǵarýǵa bolmaıtyny túsinikti jaǵdaı», - dediń óz saýalynda depýtat E. Nyǵmatýlın.
Onyń aıtýynsha, monıtorıng júrgizetin memlekettik qyzmetterdi tıisinshe materıaldyq-tehnıkalyq jaraqtandyrý protsesi belgili bir ýaqytty qajet etetini sózsiz. Osyǵan oraı, depýtattar osyndaı monıtorıng elementteriniń birin qazirdiń ózinde engizý qajettigin alǵa tartady. «Qazirgi ýaqytta Kaspıı teńiziniń qazaqstandyq sektorynda ekologııalyq qorǵaý obektisi - Kaspıı teńiziniń bıoresýrstary ekologııalyq monıtorıngtiń baqylaýynan tys qalyp otyr. Al baǵaly balyqtar men ıtbalyqtardyń jaı-kúıi men sandyq qory munaı operatsııalarynyń ekologııalyq qaýipsizdiginiń basty kórsetkishi jáne ındıkatory bolyp tabylady. Bizdiń oıymyzsha, monıtorıngtiń osyndaı mańyzdy elementi bolmasa, ekologııalyq monıtorıngti kimniń júrgizetinine qaramastan, onyń halyqaralyq standarttarǵa saı kelmeıtini belgili. Monıtorıngtiń dál osy elementin memlekettiń júrgizýiniń mańyzy asa zor, óıtkeni onyń nátıjeleri boıynsha ekologııalyq monıtorıngtiń barlyq basqa elementteriniń sapasy týraly aıtýǵa bolady», - deıdi depýtat.
Osyǵan baılanysty depýtat Kaspıı teńizinde ekologııalyq monıtorıngti tolyqqandy júrgizý úshin arnaıy sharalar qamtýdyń qajettigin alǵa tartady.
