Depýtattar qandastardyń qujattaryn retke keltirý máselesin kóterdi
«Bıyl egemendigimizge 30 jyl tolǵaly otyr. Osy jyldary 1 mln 70 myń 300 etnıkalyq qazaq atajurtyna oraldy. Onyń syrtynda búkil dúnıejúzilik qaýymdastyǵy quryldy. Prezıdent Qasym-Jomart Toqaevtyń qoldaýymen shetelden atamekenge qaıtqan azamattardyń mártebesi artyp, qany bir baýyrlarymyzdy «qandastar» deıtin boldyq. Osy kúni ol qandastarymyz ekonomıkanyń ár salasynda jemisti qyzmet etip jatqany da ras», - dedi depýtat Ǵazız Qulahmetov Úkimet basshysy Asqar Mamınniń atyna joldaǵan saýalynda.
Osy oraıda ol taǵdyrdyń tálkegimen nebir shytyrman oqıǵalarǵa tap bolyp jatqan qandastarymyzdyń áli de kóp ekenin aıtty.
«Jeke qujattarynda ulty jazylmaǵan qandastarymyzdyń aldy 9 jyl, sońy 2 jyl aralyǵynda azamattyq ala almaýynyń naqty sebebin túsindirýge ne kedergi. Olardyń bári balalaryn mektepke berýge, dárigerlerge qaratyp, bala-baqshaǵa tirkelý kezinde kóp qıyndyqtardyń baryn ashynyp aıtyp otyr. Elge oralǵysy keletin jáne oralǵan azamattar otbasylarynan ajyrap, eki-úsh memleket terrıtorııasynda ómir súrýge májbúr ekeni de aşy shyndyq. Mundaı otbasylar respýblıkanyń ár aımaǵynda bar desek, qatelespespiz. Al, olardyń Qazaqstanda dúnıege kelip, balalarynyń qujattaryn rásimdemegenin eskeretin bolsaq, tirkeýde joq búldirshinderdiń naqty esebin kim aıtyp bere alady?», - dedi Ǵazız Qulahmetov.
«Osy jaǵdaıdy eskere otyryp, QR Іshki ister, Syrtqy ister, Eńbek jáne halyqty áleýmettik qorǵaý mınıstrlikteri birlese otyryp, vedomstvoaralyq komıssııada týý týraly kýáligi joq, resmı tirkeýde joq azamattardyń naqty sanyn anyqtap, saýalda kórsetilgen azamattardyń qujattandyrý máselesin qarastyrýdy jáne resmı tıisti barlyq sharalar qoldanyp, qandastarymyzdyń ózge de problemalaryna tereń boılap, jan-jaqty jaǵdaı jasaýyńyzdy suraımyz!», - dedi ol.
